ഒറ്റപ്പാലം : റോഡരികില് പുല്ലുവെട്ടുന്നതിനിടയില് ഉണ്ടായ സ്ഫോടനത്തില് തൊഴിലുറപ്പ് തൊഴിലാളിക്ക് ഗുരുതര പരിക്ക്. ഒറ്റപ്പാലം പാലപ്പുറം എസ്ആര്കെ നഗര് തങ്കംനിവാസില് ബിന്ദു (40)വിനാണ് പരിക്കേറ്റത്. ബിന്ദുവിന്റെ ഇടത് കൈവിരലുകള്ക്കാണ് പരിക്കേറ്റത്. ഒറ്റപ്പാലം പത്തൊമ്പതാം മൈലില് ഹൗസിങ് ബോര്ഡ് കോളനിക്ക് സമീപം പാതയോരത്ത് ശുചീകരണത്തിനിടെയാണ് പൊട്ടിത്തെറി ഉണ്ടായത്. എന്നാല് എന്താണ് പൊട്ടിത്തെറിച്ചതെന്ന് വ്യക്തമല്ല. സ്ഫോടകവസ്തുവിന്റേതെന്ന് സംശയിക്കുന്ന നൂല്, സെല്ലോടേപ്പിന്റെ അംശങ്ങള് എന്നിവ സംഭവസ്ഥലത്തുനിന്ന് കണ്ടെടുത്തു.
തിങ്കളാഴ്ച വൈകീട്ട് മൂന്നരയോടെയാണ് സംഭവം. 15 തൊഴിലാളികള് ചേര്ന്ന് ഹൗസിങ് ബോര്ഡ് കോളനിയിലെ പാതയോരം ശുചിയാക്കുകയായിരുന്നു. പുല്ലുവെട്ടിത്തെളിക്കുന്നതിനിടെ വലിയ ശബ്ദത്തോടെ പൊട്ടിത്തെറി ഉണ്ടായെന്നാണ് ഒപ്പമുള്ള തൊഴിലാളികള് പറയുന്നത്. നല്ല പുകയും സ്ഥലത്ത് പരന്നു. പിന്നീടാണ് ബിന്ദുവിന്റെ ഇടത് കൈപ്പത്തിയില് നിന്ന് രക്തം ഒലിച്ചിറങ്ങുന്നത് കാണുന്നത്. വിരലുകള്ക്ക് ഗുരുതര പരിക്കുള്ളതിനാല് പ്രാഥമികചികിത്സയ്ക്ക് ശേഷം ബിന്ദുവിനെ തൃശ്ശൂര് മെഡിക്കല്കോളേജിലേക്ക് മാറ്റി.
