കാഴ്ച പരിമിതിയും ശാരീരിക അവശതയുമുള്ള സമ്മതിദായകന് പരസഹായം കൂടാതെ ബാലറ്റിംഗ് യൂണിറ്റിലെ ചിഹ്നം തിരിച്ചറിയുന്നതിനോ ബട്ടണ് അമര്ത്തി വോട്ടു രേഖപ്പെടുത്തുന്നതിനോ കഴിയുന്നില്ലെന്ന് പ്രിസൈഡിങ് ഓഫീസര്ക്ക് ബോധ്യപ്പെട്ടാല് സഹായിയെ അനുവദിക്കും. വോട്ട് ചെയ്യുന്നതിന് വോട്ടര് നിര്ദേശിക്കുന്ന സഹായിയെയാണ് അനുവദിക്കുക. ഇയാള്ക്ക് 18 വയസ് പൂര്ത്തിയായിരിക്കണം. വോട്ടറുടെ ഇടതു കൈയ്യിലെ ചൂണ്ടുവിരലില് മഷിപുരട്ടുന്നതോടൊപ്പം സഹായിയുടെ വലതു കൈയിലെ ചൂണ്ടുവിരലിലും മഷി പുരട്ടും. സ്ഥാനാര്ഥിയേയും പോളിങ് ഏജന്റിനെയും ഇത്തരത്തില് സഹായിയാകാന് അനുവദിക്കില്ല. വോട്ടറുടെ നിരക്ഷരത സഹായിയെ അനുവദിക്കാന് മതിയായ കാരണമല്ല. ഒരാളെ ഒന്നിലധികം സമ്മതിദായകരുടെ സഹായിയായി പ്രവര്ത്തിക്കുന്നതിന് അനുവദിക്കില്ല. താന് രേഖപ്പെടുത്തിയ വോട്ടിന്റെ രഹസ്യ സ്വഭാവം കാത്തു സൂക്ഷിക്കുമെന്നും അതേ ദിവസത്തില് മറ്റേതെങ്കിലും പോളിംഗ് സ്റ്റേഷനില് സഹായിയായി പ്രവര്ത്തിച്ചിട്ടില്ലെന്നും രേഖപ്പെടുത്തിയ പ്രഖ്യാപനം നിര്ദ്ദിഷ്ട ഫോറത്തില് പ്രിസൈഡിംഗ് ഓഫീസര്ക്ക് നല്കണം. ഈ ഫോറം പ്രത്യേക കവറില് പ്രിസൈഡിങ് ഓഫീസര് വരണാധികാരിക്ക് അയച്ചുനല്കും.
ബാലറ്റ് യൂണിറ്റില് ബ്രെയിലി ലിപി ഉണ്ടാകും
അന്ധത/കാഴ്ച പരിമിതിയുള്ള വോട്ടര്മാര്ക്ക് തദേശ തിരഞ്ഞെടുപ്പില് സ്വയം വോട്ട് രേഖപ്പെടുത്താന് കഴിയുന്ന വിധത്തില് ബാലറ്റ് യൂണിറ്റിന്റെ വലതു വശത്തു ബ്രെയിലി ലിപി ആലേഖനം ചെയ്തിട്ടുണ്ട്. കാഴ്ച പരിമിതിയുള്ളവരും ശാരീരിക അവശതയുള്ളവരും രോഗബാധിതരും പ്രായമായവരുമായ വോട്ടര്മാര്ക്ക് ക്യൂ ഇല്ലാതെ പോളിംഗ് സ്റ്റേഷനില് പ്രവേശിച്ച് വോട്ടുരേഖപ്പെടുത്താനും ഭിന്നശേഷി വോട്ടര്മാര്ക്ക് റാമ്പ് സൗകര്യവും ഏര്പ്പെടുത്തിയിട്ടുണ്ട്. പോളിങ് സ്റ്റേഷനില് കുടിവെള്ളം, ഇരിക്കാനുള്ള സൗകര്യം എന്നിവ ഒരുക്കും.
