മിയാമി: </strong സ്വന്തം ശരീരത്തിന്മേൽ ഒരു വ്യക്തിക്കുള്ള സ്വയംനിർണ്ണയാധികാരവും വൈദ്യശാസ്ത്രപരമായ അനിവാര്യതകളും തമ്മിലുള്ള വലിയൊരു തർക്കത്തിനാണ് ഫ്ലോറിഡ സാക്ഷ്യം വഹിച്ചത്. സിസേറിയൻ ശസ്ത്രക്രിയയോടുള്ള യുവതിയുടെ വിയോജിപ്പ് അസാധാരണമായ ഒരു നിയമയുദ്ധത്തിലേക്ക് വഴിമാറുകയായിരുന്നു.. പ്രസവവേദനയാൽ പുളയുന്നതിനിടെ, സിസേറിയൻ ശസ്ത്രക്രിയയ്ക്ക് വിസമ്മതിച്ച ചെറിസ് ഡോയ്ലി എന്ന യുവതിക്ക് തന്റെ നിലപാടിൽ ഉറച്ചുനിൽക്കാൻ നേരിടേണ്ടി വന്നത് ലാപ്ടോപ്പ് സ്ക്രീനിലൂടെയുള്ള കോടതി വിചാരണയാണ്. ഫ്ലോറിഡയിലെ ജാക്സൺവില്ലിലുള്ള യൂണിവേഴ്സിറ്റി ഓഫ് ഫ്ലോറിഡ ഹെൽത്ത് ഹോസ്പിറ്റലിലാണ് മനുഷ്യാവകാശങ്ങളെയും മെഡിക്കൽ എത്തിക്സിനെയും ചോദ്യം ചെയ്യുന്ന ഈ സംഭവം അരങ്ങേറിയത്. മൂന്ന് കുട്ടികളുടെ അമ്മയായ ചെറിസ്, തന്റെ നാലാമത്തെ പ്രസവം സ്വാഭാവികമായ രീതിയിൽ നടക്കണമെന്ന് ആഗ്രഹിച്ചാണ് ആശുപത്രിയിൽ എത്തിയത്. മുൻപ് നടന്ന മൂന്ന് പ്രസവങ്ങളും സിസേറിയൻ ആയതിനാൽ, ഇത്തവണ ഗർഭപാത്രം തകരാനുള്ള (uterine rupture) നേരിയ സാധ്യതയുണ്ടെന്ന് ചൂണ്ടിക്കാട്ടി ഡോക്ടർമാർ ശസ്ത്രക്രിയ വേണമെന്ന് നിർബന്ധിക്കുകയായിരുന്നു.
എന്നാൽ ഇതിനുള്ള സാധ്യത രണ്ട് ശതമാനത്തിൽ താഴെ മാത്രമാണെന്ന് ബോധ്യമുള്ള ചെറിസ്, സ്വാഭാവിക പ്രസവത്തിന് ആദ്യം ശ്രമിക്കണമെന്നും അനിവാര്യമെങ്കിൽ മാത്രം ശസ്ത്രക്രിയ മതിയെന്നും നിലപാടെടുത്തു. രോഗിയുടെ ആഗ്രഹത്തെ മാനിക്കുന്നതിന് പകരം ആശുപത്രി അധികൃതർ നിയമത്തിന്റെ വഴി തേടുകയാണ് ചെയ്തത്. യുവതി പ്രസവവേദന അനുഭവിക്കുന്നതിനിടെ നഴ്സുമാർ ഒരു ടാബ്ലെറ്റുമായി എത്തുകയും സൂം മീറ്റിംഗിൽ ജോയിൻ ചെയ്യാൻ ആവശ്യപ്പെടുകയുമായിരുന്നു. താൻ പങ്കെടുക്കുന്നത് ഒരു കോടതി നടപടിയിലാണെന്ന് തിരിച്ചറിഞ്ഞ ചെറിസ്, ശസ്ത്രക്രിയ നടത്താൻ ആശുപത്രിക്ക് അനുമതി നൽകരുതെന്ന് കിടക്കയിൽ കിടന്ന് ജഡ്ജിയോട് അഭ്യർത്ഥിച്ചു. തന്റെ ജീവനും കുഞ്ഞിന്റെ സുരക്ഷയും അപകടത്തിലാണെന്ന ആശുപത്രിയുടെ വാദം ജഡ്ജി അംഗീകരിക്കുകയും നിർബന്ധിത ശസ്ത്രക്രിയയ്ക്ക് അനുമതി നൽകുകയും ചെയ്തു. ഒരു സ്ത്രീ ഗർഭിണിയായിരിക്കുമ്പോൾ അവൾക്ക് സ്വന്തം ചികിത്സാ കാര്യങ്ങളിൽ തീരുമാനമെടുക്കാനുള്ള അവകാശം എത്രത്തോളമുണ്ടെന്ന വലിയ ചോദ്യമാണ് ഈ വിധി ഉയർത്തുന്നത്. പ്രസവസമയത്ത് ലഭിക്കേണ്ട മാനസിക പിന്തുണയ്ക്ക് പകരം ഭീഷണിയും നിയമനടപടികളുമാണ് തനിക്ക് നേരിടേണ്ടി വന്നതെന്ന് ചെറിസ് പിന്നീട് മാധ്യമങ്ങളോട് പ്രതികരിച്ചു. വൈദ്യശാസ്ത്രരംഗത്തെ നിർബന്ധിത ഇടപെടലുകൾക്കെതിരെയും സ്ത്രീകളുടെ പ്രസവകാലത്തെ സ്വയംഭരണാധികാരത്തിന് വേണ്ടിയും വാദിക്കുന്ന മനുഷ്യാവകാശ പ്രവർത്തകർക്കിടയിൽ ഈ സംഭവം വലിയ പ്രതിഷേധത്തിന് കാരണമായിട്ടുണ്ട്.
