കോന്നി : തോട്ടിലെ ഒഴുക്കിൽ പെട്ട് കാണാതായ ആളിൻ്റെ മൃതദേഹം കണ്ടെത്തി. കഴിഞ്ഞ ദിവസം രാത്രിയിൽ ആണ് സംഭവം നടന്നത്. കോന്നി പരമേശ്വര മെഡിക്കൽസ് എന്ന സ്ഥാപനം നടത്തി വന്നിരുന്ന അതിരുങ്കൽ സ്വദേശി പ്രവീൺ (47 ) ന്റെ മൃതദേഹമാണ് ഇന്ന് രാവിലെ അരുവാപ്പുലം എള്ളം കാവ് ക്ഷേത്രത്തിനടുത്ത് വലിയ തോട്ടിൽ നിന്നു ഞായറാഴ്ച കണ്ടെടുത്തത്. 13ന് വെള്ളിയാഴ്ച രാത്രി 11 മണിയോടെയാണ് കാണാതായത്. കോന്നിയിൽ നിന്ന് വീട്ടിലേക്ക് മടങ്ങുന്ന വഴിയിൽ പ്രവീൺ വകയാറിനും മുറിഞ്ഞകല്ലിനും ഇടയിൽ മുറിഞ്ഞകൽ പുളിഞ്ചാണി തോട്ടിലേക്ക് വീഴുകയായിരുന്നു. ബൈക്ക് തോടിന് കരയിൽ നിന്ന് ലഭിച്ചിരുന്നു.
ബൈക്ക് നിർത്തി ഇറങ്ങിയ ശേഷം പ്രവീൺ കാൽ വഴുതി തോട്ടിൽ വീണതായി കരുതുന്നു. ഫോണിൽ വിളിച്ചിട്ട് പ്രവീണിനെ ബന്ധപ്പെടാൻ സാധിക്കാതെ വന്നതോടെ വീട്ടുകാർ അന്വേഷിച്ച് ഇറങ്ങുകയും പ്രവീൺ സഞ്ചരിച്ച ബൈക്ക് തോടിന് കരയിൽ നിന്ന് കണ്ടെത്തുകയുമായിരുന്നു. തുടർന്ന് വീട്ടുകാർ സമീപത്തെ വീടിന്റ സി സി റ്റി വി ദൃശ്യങ്ങൾ പരിശോധിച്ചപ്പോൾ പ്രവീൺ തോട്ടിലേക്ക് വീഴുന്ന സി സി റ്റി വി ദൃശ്യങ്ങളും ലഭിച്ചു. ദൃശ്യങ്ങൾ പോലീസ് ശേഖരിച്ചിട്ടുണ്ട്. ശനിയാഴ്ച കോന്നിയിൽ നിന്ന് അഗ്നിരക്ഷാ സേനയും നാട്ടുകാരും എത്തി തോട്ടിൽ തിരച്ചിൽ നടത്തിയെങ്കിലും പ്രവീണിനെ കണ്ടെത്താൻ കഴിഞ്ഞില്ല. സംഭവം നടന്ന സ്ഥലത്ത് നിന്ന് പ്രവീണിന്റെ ചെരുപ്പും മുണ്ടും കണ്ടെത്തിയിരുന്നു.
