പത്തനംതിട്ട : കലഞ്ഞൂർ കനാൽ അക്വാഡക്റ്റിൽ വീണ് കാണാതായ 70 വയസ്സുകാരനായ വിശ്വനാഥൻ പിള്ളയുടെ മൃതദേഹം കണ്ടെത്തി. കലഞ്ഞൂർ കുന്നിലയം ഭാഗത്തെ കനാലിലെ ഇരുമ്പ് വേലിക്ക് സമീപം കുടുങ്ങിക്കിടക്കുന്ന നിലയിലാണ് ഇന്ന് രാവിലെ മൃതദേഹം കണ്ടെത്തിയത്. ഇന്നലെ വൈകുന്നേരം ആറരയോടെയാണ് അപകടത്തിൽപെട്ടത്. കലഞ്ഞൂർ ഡിപ്പോ ജംഗ്ഷന് സമീപമുള്ള കനാൽ അക്വാഡക്റ്റിലൂടെ വീട്ടിലേക്ക് നടന്നുപോകുന്നതിനിടെ അദ്ദേഹം കാൽ വഴുതി കനാലിലേക്ക് വീഴുകയായിരുന്നു.
കനാലിന് കുറുകെയുള്ള ചെറിയ നടപ്പാതയിലൂടെ സഞ്ചരിക്കുമ്പോഴാണ് അപകടം സംഭവിച്ചത്. വിശ്വനാഥൻ പിള്ള വെള്ളത്തിൽ വീഴുന്നത് കണ്ട കുട്ടികൾ ഉടൻ തന്നെ കയർ ഇട്ടുനൽകി രക്ഷിക്കാൻ ശ്രമിച്ചെങ്കിലും പെട്ടെന്നുതന്നെ വെള്ളത്തിൽ താഴ്ന്നുപോവുകയായിരുന്നു. നാട്ടുകാരും പോലീസും ചേർന്ന് ഇന്നലെ വൈകുന്നേരം മുതൽ തന്നെ തിരച്ചിൽ ആരംഭിച്ചിരുന്നു. ഇന്ന് രാവിലെ ആറരയോടെയാണ് കുന്നിലയം ഭാഗത്തെ ഇരുമ്പ് വേലിയിൽ തങ്ങിനിൽക്കുന്ന നിലയിൽ മൃതദേഹം കണ്ടെത്തിയത്.
