ബോളിവുഡിൽ കോളിളക്കം സൃഷ്ടിച്ച പല വിവാഹങ്ങളിൽ ഒന്നായിരുന്നു ശ്രീദേവിയുടെയും ബോണി കപൂറിന്റെയും ബന്ധവും വിവാഹവും. വിവാദങ്ങൾ, ആരോപണങ്ങൾ, അധിക്ഷേപങ്ങൾ തുടങ്ങി പല വെല്ലുവിളികളും ഈ വിവാഹ ബന്ധം അതിജീവിച്ചു. ശ്രീദേവി-ബോണി കപൂർ വിവാഹത്തിന്റെ 27ാം വാർഷിക ദിനമായിരുന്നു ഇന്നലെ. വാർഷിക ദിനത്തിൽ ശ്രീദേവിക്കൊപ്പമുള്ള പഴയൊരു ഫോട്ടോ ബോണി കപൂർ പങ്കുവെച്ചിരുന്നു.
ബോളിവുഡിൽ മാത്രം തിളങ്ങിയിരുന്നു ബോണി കപൂർ അടുത്തിടെ തമിഴ് സിനിമകളിലും മുഖം കാണിച്ചിരുന്നു. മാമന്നൻ സിനിമയുടെ ഓഡിയോ ലോഞ്ചിനിടെ ബോണി കപൂർ തന്റെ ‘സൗന്ദര്യ സങ്കല്പ’ത്തെ കുറിച്ച് പറഞ്ഞ വാക്കുകളാണ് സോഷ്യൽ മീഡിയയും തമിഴ് മാധ്യമങ്ങളും ചർച്ചയാക്കുന്നത്. തന്റെ ഭാര്യയെ പോലെ തന്നെ മാമന്നൻ സിനിമയിലെ നായിക കീർത്തി സുരേഷും കഴിവുള്ള അഭിനേത്രിയാണെന്ന് ബോണി കപൂർ പറയുന്നു.
മാമന്നൻ ആണ് കീർത്തിയുടേതായി അടുത്തതായി പുറത്തിറങ്ങാനുള്ള സിനിമ. ഇതോടൊപ്പം, മെഹര് രമേഷ് സംവിധാനം ചെയ്ത് ചിരഞ്ജീവി നായകനായ ചിത്രത്തിലും കീർത്തി ഉണ്ട്. ‘വേതാള’ത്തിന്റെ റീമേക്കാണ് ‘ഭോലാ ശങ്കര്’. കീര്ത്തി സുരേഷ് സഹോദരിയായി വേഷമിടുമ്പോള് തമന്നയാണ് നായിക. ബാലതാരമായി സിനിമയിലെത്തിയ കീർത്തി ലണ്ടനില് നിന്നും ഫാഷന് ഡിസൈനിങ്ങ് പഠനം പൂര്ത്തിയാക്കിയ ശേഷമാണ് തിരിച്ചുവരവ് നടത്തിയത്.
