ഡല്ഹി: തെറ്റിദ്ധരിപ്പിക്കുന്ന പരസ്യങ്ങള് പിന്വലിക്കാന് മോന്ഡെലസ് ഇന്ത്യയോട് ആവശ്യപ്പെട്ട് ദേശീയ ബാലാവകാശ കമീഷന്. കമ്പനിയുടെ കീഴില് വരുന്ന ബ്രാന്ഡായ ബോണ്വീറ്റയുടെ പരസ്യങ്ങള് പിന്വലിക്കാനാണ് ആവശ്യപ്പെട്ടിരിക്കുന്നത്. ഇതുമായി ബന്ധപ്പെട്ട് ഏഴ് ദിവസത്തിനകം വിശദീകരണം നല്കാനും ബോണ്വിറ്റയോട് ആവശ്യപ്പെട്ടിട്ടുണ്ട്.
ബോണ്വിറ്റയില് പഞ്ചസാരയുടെ അളവ് അധികമാണെന്ന പരാതിയുടെ അടിസ്ഥാനത്തിലാണ് നടപടിയെന്ന് ബാലാവകാശ കമീഷന് വിശദീകരിച്ചു. ഹെല്ത്ത് ഡ്രിങ്ക് എന്ന പേരില് ബോണ്വിറ്റയുടെ മാര്ക്കറ്റിങ് നടത്തിയ കമ്പനി കുട്ടികളുടെ ആരോഗ്യം ഉല്പന്നം മൂലം മെച്ചപ്പെടുമെന്നും പ്രചാരണം നടത്തിയിരുന്നു. എന്നാല്, ബോണ്വിറ്റയില് കണ്ടെത്തിയ ഉയര്ന്ന അളവിലുള്ള പഞ്ചസാര സാന്നിധ്യം കുട്ടികളുടെ ആരോഗ്യത്തെ ഗുരുതരമായി ബാധിക്കുന്നതാണ്. ഇത് മറച്ചുവെക്കുന്നതാണ് ബോണ്വിറ്റയുടെ പരസ്യമെന്നും ബാലാവകാശ കമീഷന് വിശദീകരിച്ചു.
