മുംബെെ : ലോക്ക്ഡൗൺ തീരാൻ ദിവസങ്ങൾ മാത്രം ബാക്കി നിൽക്കെ എംജി മോട്ടോർ ഇന്ത്യ ഹെക്ടർ എസ്‌യുവിയുടെ ഭാരത് സ്റ്റേജ് 6 മലിനീകരണ നീയന്ത്രണ മാനദണ്ഡങ്ങൾ പാലിക്കുന്ന ഡീസൽ വേരിയന്റുകളുടെ വില പ്രഖ്യാപിച്ചു. 13.88 ലക്ഷം മുതൽ 17.73 ലക്ഷം വരെയാണ് ബിഎസ്6 ഹെക്ടർ ഡീസൽ വേരിയന്റുകളുടെ എക്‌സ്-ഷോറൂം വില. ഇതുവരെ വില്പനയിലുണ്ടായിരുന്ന ഡീസൽ വേരിയന്റുകളെക്കാൾ 40,000 രൂപ മുതൽ 45,000 രൂപ വരെയാണ് ബിഎസ് 6 വേരിയന്റുകൾക്ക് വില വർദ്ധിച്ചിട്ടുണ്ട്.
ഭാരത് സ്റ്റേജ് 6 മലിനീകരണ നീയന്ത്രണ മാനദണ്ഡങ്ങൾക്കനുസരിച്ച് പരിഷ്കരിച്ച 2.0-ലിറ്റർ, 4-സിലിണ്ടർ ടർബോ-ഡീസൽ എൻജിന്റെ ഔട്പുട്ടിൽ മാറ്റം വന്നിട്ടില്ല. 168 എച് പി പവറും 350 എൻഎം ടോർക്കും ഉത്പാദിപ്പിക്കുന്ന എൻജിൻ 6-സ്പീഡ് മാന്വൽ ട്രാൻസ്മിഷൻ ആയാണ് ബന്ധിപ്പിച്ചിരിക്കുന്നത്.
കർശനമായ മലിനീകരണ നിയന്ത്രണ മാനദണ്ഡങ്ങൾ പാലിക്കുന്ന പെട്രോൾ, ഹൈബിഡ് എഞ്ചിനുള്ള ഹെക്ടർ മോഡലുകളുടെ വില ഫെബ്രുവരിയിൽ തന്നെ എംജി മോട്ടോർ പ്രഖ്യാപിച്ചിരുന്നു. 140 എച്ച്പി പവർ ആണ് 1.5 ലീറ്റർ ടർബോ പെട്രോൾ എൻജിൻ നിർമിക്കുന്നത്. ബെൽറ്റ് സ്റ്റാർട്ടർ ജനറേറ്ററോടുകൂടിയ 1.5 ലീറ്റർ ടർബോ പെട്രോൾ ഹൈബ്രിഡ് എൻജിനും ഹെക്ടറിലുണ്ട്. 6 സ്പീഡ് മാനുവൽ, ഡിസിടി ട്രാൻസ്മിഷനുകളിലാണ് ഹെക്ടർ പെട്രോൾ, ഹൈബ്രിഡ് മോഡലുകൾ വില്പനയിലുള്ളത്.
