തിരുവനന്തപുരം : ധനമന്ത്രി കെ എന് ബാലഗോപാല് അല്പ്പസമയത്തിനകം നിയമസഭയില് അവതരിപ്പിക്കാന് പോകുന്ന ബജറ്റില് വലിയ പ്രതീക്ഷയില്ലെന്ന് പ്രതിപക്ഷ നേതാവ് വി ഡി സതീശന്. ബജറ്റിന്റെ വിശ്വാസ്യത നഷ്ടപ്പെട്ടു. കഴിഞ്ഞ തവണ പ്രഖ്യാപിച്ച നിരവധി പദ്ധതികള് നടപ്പാക്കിയിട്ടില്ല. നികുതി പിരിവ് കൃത്യമായി നടക്കുന്നില്ല. കഴിഞ്ഞ തവണ പ്രഖ്യാപിച്ച പരിപാടികള് തുടങ്ങാന് പോലും സാധിച്ചിട്ടില്ല.
ബജറ്റിന്റെ പെര്ഫോമന്സ് ഓഡിറ്റിംഗാണ് ആവശ്യം. ബജറ്റില് പറയുന്ന കാര്യങ്ങളുടെ മുക്കാല് ഭാഗം കാര്യങ്ങളും നടപ്പാക്കാന് സര്ക്കാറിന് സാധിക്കുന്നില്ല. അതുകൊണ്ട് വരുമാനമില്ല, ചെലവ് വര്ധിക്കുന്നു. ചെലവ് നിയന്ത്രിക്കാന് കഴിയുന്നുമില്ല, വരുമാനം കൂടുന്നുമില്ല. നികുതി പിരിവ് സംസ്ഥാനത്ത് നടക്കുന്നില്ല. നികുതി കുടിശിക വര്ധിക്കുകയാണ്.
ജി എസ് ടി വന്നിട്ട് നാല് വര്ഷമായി. അതിന് മുമ്പുള്ള വാറ്റിലെ കുടിശിക പോലും പിരിച്ചെടുക്കാന് സര്ക്കാറിന് കഴിഞ്ഞിട്ടില്ല. കേന്ദ്ര ബജറ്റാണെങ്കിലും സംസ്ഥാന ബജറ്റാണെങ്കിലും ചില തത്വങ്ങളുണ്ട്. വരുമാനം കൂട്ടുകയും ചെലവ് കുറക്കുകയും ചെയ്യുന്നത്. അതില് സര്ക്കാര് ദയനീയമായി പരാജയപ്പെട്ടിരിക്കുകയാണെന്നും പ്രതിപക്ഷ നേതാവ് ചൂണ്ടിക്കാട്ടി.
