കോഴിക്കോട് : കോര്‍പ്പറേഷന്‍ ജീവനക്കാരുടെ പാസ്വേഡടക്കം വിവരങ്ങള്‍ ദുരുപയോഗം ചെയ്ത് അനധികൃത കെട്ടിടങ്ങള്‍ക്ക് അനുമതി നല്‍കിയെന്ന കേസില്‍ പിടിയിലായ കോര്‍പ്പറേഷന്‍ ജീവനക്കാരുമായി പോലീസ് ഓഫിസില്‍ തെളിവെടുപ്പ് നടത്തി.കോര്‍പറേഷന്‍ കെട്ടിട നികുതി വിഭാഗം ക്ലര്‍ക്ക് ചേവരമ്ബലം പൊന്നോത്ത് എന്‍.പി സുരേഷ് (56), കോര്‍പറേഷന്‍ തൊഴില്‍ നികുതി വിഭാഗത്തിലെ ക്ലര്‍ക്ക് വേങ്ങേരി അനില്‍കുമാര്‍ മഠത്തില്‍ (52) എന്നിവരെയാണ് കേസന്വേഷിക്കുന്ന അസി.പോലീസ് കമീഷണര്‍ എ.എം സിദ്ദീഖിന്റെ നേതൃത്വത്തിലുള്ള സംഘം കോര്‍പറേഷന്‍ ഓഫിസിലെത്തിച്ചത്.
കഴിഞ്ഞ ദിവസം തന്നെ രണ്ട് പ്രതികളെയും കോര്‍പ്പറേഷന്‍ സെക്രട്ടറി സസ്പെന്‍ഡ് ചെയ്തിരുന്നു. ഇവരെ കൂടുതല്‍ തെളിവെടുപ്പിനായി രണ്ട് ദിവസത്തേക്ക് വിട്ടുകിട്ടണമെന്നപേക്ഷിച്ച്‌ പോലീസ് അപേക്ഷ നല്‍കിയിരുന്നു. ഇതിന്റെ അടിസ്ഥാനത്തില്‍ വ്യാഴാഴ്ച ഉച്ചക്ക് 12 മുതല്‍ വെള്ളിയാഴ്ച വൈകീട്ട് നാല് വരെയാണ് ചീഫ് ജുഡീഷ്യല്‍ മജിസ്ട്രേറ്റ് എ. ഫാത്തിമാ ബീവി പ്രതികളെ വിട്ടു നല്‍കിയത്. തുടര്‍ന്ന് പ്രതികളുമായി കോര്‍പറേഷന്‍ ഓഫിസിലെത്തിയ സംഘം റവന്യൂ വിഭാഗത്തില്‍ പ്രതികള്‍ കൈകാര്യം ചെയ്ത ഫയലുകള്‍ ഒന്നാം പ്രതിയുടെ സാന്നിധ്യത്തില്‍ കസ്റ്റഡിയിലെടുത്തു. പ്രതികളെ ഓഫിസ് വളപ്പിലെ വാഹനത്തിലേക്ക് മാറ്റിയ ശേഷം കമ്പ്യൂട്ടറുകളും മറ്റുരേഖകളും പരിശോധിച്ചു. കോര്‍പ്പറേഷന്‍ ജീവനക്കാരുടെ സഹായത്തോടെയായിരുന്നു തെളിവെടുപ്പ്. നിരവധി ജീവനക്കാരുടെ മൊഴി രേഖപ്പെടുത്തി. പ്രതികള്‍ കുറ്റസമ്മതം നടത്തിയതായാണ് പോലീസിന്റെ റിമാന്‍ഡ് റിപ്പോര്‍ട്ട്.
