തിരുവനന്തപുരം: തെക്കന് കേരളം -തെക്കന് തമിഴ്നാട് തീരങ്ങള്ക്ക് കേന്ദ്ര കാലാവസ്ഥ വകുപ്പ് ചുഴലിക്കാറ്റ് സാധ്യത മുന്നറിയിപ്പ് പ്രഖ്യാപിച്ചു. ബംഗാള് ഉള്ക്കടലില് നിന്നും അറബിക്കടലിലേക്ക് നീങ്ങുന്ന ബുറെവി ചുഴലിക്കാറ്റ് കേരളത്തില് പ്രവേശിക്കാനും സാധ്യത. പത്ത് മണിയോടെ സ്വകാര്യ കാലാവസ്ഥാ ഏജന്സികള് പുറത്തു വിട്ട പുതിയ വിവരങ്ങള് പ്രകാരം ചുഴലിക്കാറ്റിന്റെ സഞ്ചാര പഥത്തില് കേരളവും ഉള്പ്പെടുന്നുണ്ട്. തിരുവനന്തപുരം ജില്ലയിലെ നെയ്യാറ്റിന്കര വഴി ചുഴലിക്കാറ്റ് കടന്ന് പോയേക്കും എന്നാണ് കേന്ദ്ര കാലാവസ്ഥാ കേന്ദ്രം ഒടുവില് പുറത്തു വിട്ട വിവരം. അതേസമയം നൂറ് കിലോമീറ്ററിന് താഴെയാണ് ചുഴലിക്കാറ്റിന് വേഗത എന്നതിനാല് അമിതആശങ്ക വേണ്ടെന്നും ജനങ്ങള് ജാഗ്രത പാലിച്ചാല് മതിയെന്നും ചൂണ്ടിക്കാട്ടപ്പെടുന്നു.
തെക്ക് കിഴക്കന് ബംഗാള് ഉള്ക്കടലില് രൂപം കൊണ്ട ‘ബുറെവി’ചുഴലിക്കാറ്റ് കഴിഞ്ഞ 6 മണിക്കൂറായി മണിക്കൂറില് 15 കിമീ വേഗതയില് പടിഞ്ഞാറ് ദിശയില് സഞ്ചരിച്ച് ഒടുവില് വിവരം ലഭിക്കുമ്പോള് കാറ്റ്. ഇത് ശ്രീലങ്കന് തീരത്ത് നിന്ന് ഏകദേശം 470 കിമീ ദൂരത്തിലും കന്യാകുമാരിയില് നിന്ന് ഏകദേശം 700 കിമീ ദൂരത്തിലുമാണ്. അടുത്ത 12 മണിക്കൂറില് ചുഴലിക്കാറ്റ് കൂടുതല് ശക്തി പ്രാപിച്ച് ഡിസംബര് 2 ന് വൈകീട്ടോടെ ശ്രീലങ്കന് തീരം കടക്കുമെന്നും കേന്ദ്ര കാലാവസ്ഥ വകുപ്പ് പ്രവചിക്കുന്നു.
ശ്രീലങ്കന് തീരത്തെത്തുമ്പോള് ചുഴലിക്കാറ്റിന് അകത്തെ കാറ്റിന്റെ പരമാവധി വേഗത മണിക്കൂറില് ഏകദേശം 80 മുതല് 90 കിമീ വരെ ആയിരിക്കുമെന്നാണ് പ്രതീക്ഷിക്കുന്നത്. ചുഴലിക്കാറ്റ് ഡിസംബര് 3 നോട് കൂടി ഗള്ഫ് ഓഫ് മാന്നാര് എത്തുകയും ഡിസംബര് 4 ന് പുലര്ച്ചെയോടെ കന്യാകുമാരിയുടെയും പാമ്പന്റെയും ഇടയിലൂടെ തെക്കന് തമിഴ്നാട് തീരത്തേക്ക് പ്രവേശിക്കുകയും ചെയ്യാനാണ് സാധ്യത. ഈ സാഹചര്യത്തില് ഇനിയൊരു അറിയിപ്പുണ്ടാകുന്നത് വരെ കേരള തീരത്ത് നിന്ന് കടലില് പോകുന്നത് പൂര്ണ്ണമായും നിരോധിച്ചു. വിലക്ക് എല്ലാതരം മല്സ്യബന്ധന യാനങ്ങള്ക്കും ബാധകമായിരിക്കും.
നിലവില് മല്സ്യബന്ധനത്തിലേര്പ്പെട്ടിരിക്കുന്നവര് എത്രയും പെട്ടെന്ന് തന്നെ ഏറ്റവും അടുത്തുള്ള സുരക്ഷിത തീരത്ത് എത്തിച്ചേരേണ്ടതാണ്. ചുഴലിക്കാറ്റിന്റെ വികാസവും സഞ്ചാരപഥവും വിലയിരുത്തി സംസ്ഥാന ദുരന്ത നിവാരണ അഥോറിറ്റി അനുമതി നല്കുന്നത് വരെ കേരള തീരത്ത് നിന്ന് കടലില് പോകാന് അനുവദിക്കുന്നതല്ല. ഡിസംബര് 2 മുതല് ഡിസംബര് 4 വരെയുള്ള ദിവസങ്ങളില് കേരളത്തില് പലയിടത്തും അതിശക്തമായ മഴ ലഭിക്കാന് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഡിസംബര് 3 ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ ജില്ലകളില് അതിതീവ്ര മഴ ലഭിക്കാനുള്ള സാധ്യതയും പ്രവചിക്കപ്പെട്ടിരിക്കുന്നു. ശക്തമായ കാറ്റിനും സാധ്യതയുണ്ട്. ആവശ്യമായ തയ്യാറെടുപ്പുകള് പൂര്ത്തീകരിക്കാന് സര്ക്കാര് സംവിധാനങ്ങള്ക്ക് ദുരന്ത നിവാരണ അഥോറിറ്റി നിര്ദ്ദേശം നല്കിയിട്ടുണ്ട്. പൊതുജനങ്ങള് ജാഗ്രത പാലിക്കണമെന്ന് നിര്ദേശിക്കുന്നു.
ചുഴലിക്കാറ്റിന്റെ വികാസവും സഞ്ചാരപഥവും കേന്ദ്ര കാലാവസ്ഥ വകുപ്പും സംസ്ഥാന ദുരന്ത നിവാരണ അഥോറിറ്റിയും സസൂക്ഷ്മം നിരീക്ഷിച്ചു വരികയാണ്. മുന്നറിയിപ്പുകളില് വരുന്ന മാറ്റങ്ങള് അപ്ഡേറ്റ് ചെയ്യുന്നതാണ്. സിസ്റ്റത്തിന്റെ നിലവിലെ സ്ഥാനവും കേന്ദ്ര കാലാവസ്ഥ വകുപ്പ് പ്രവചിക്കുന്ന സഞ്ചാരപഥവും ഇതോടൊപ്പം നല്കുന്നു.
48 വില്ലേജുകളില് പ്രത്യേക ശ്രദ്ധ
ചുഴലിക്കാറ്റിന്റെ പശ്ചാത്തലത്തില് തിരുവനന്തപുരം ജില്ലയിലെ 48 വില്ലേജുകളില് പ്രത്യേക ശ്രദ്ധ നല്കാന് റവന്യൂ, പോലീസ്, തദ്ദേശ സ്വയംഭരണ അധികൃതര്ക്കു നിര്ദ്ദേശം നല്കി.
കരിംകുളം, കാഞ്ഞിരംകുളം, അതിയന്നൂര്, വെങ്ങാനൂര്, കുളത്തുമ്മല് കള്ളിക്കാട്, ആര്യനാട്, വെള്ളനാട്, ഉഴമലയ്ക്കല്, തൊളിക്കോട്, കോട്ടുകാല്, പള്ളിച്ചല്, മലയിന്കീഴ്, മാറനല്ലൂര്, കല്ലിയൂര്, വിളപ്പില്, വിളവൂര്ക്കല്, കാരോട്, പാറശാല, തിരുപുറം, ചെങ്കല്, കുളത്തൂര്, കൊല്ലയില്, ആനാവൂര്, പെരുങ്കടവിള, കീഴാറൂര്, ഒറ്റശേഖരമംഗലം, വാഴിച്ചല്, അരുവിക്കര, ആനാട്, പനവൂര്, വെമ്പായം, കരിപ്പൂര്, തെന്നൂര്, കുരുപ്പുഴ, കോലിയക്കോട്, പാങ്ങോട്, കല്ലറ, കോട്ടുകാല്, വെള്ളറട, കരകുളം, പുല്ലമ്പാറ, വാമനപുരം, പെരുമ്പഴുതൂര്, വിതുര, മണക്കാട്, അമ്പൂരി, മണ്ണൂര്ക്കര വില്ലേജുകളിലാണു പ്രത്യേക ശ്രദ്ധ നല്കാന് നിര്ദേശിച്ചിരിക്കുന്നത്.
ഇവിടങ്ങളില് റവന്യൂ വകുപ്പിന്റെ പ്രത്യേക സംഘം നിരീക്ഷണം തുടങ്ങി. തഹസില്ദാര്മാരുടെ നേതൃത്വത്തില് ജില്ലാതലത്തില് പ്രവര്ത്തനങ്ങള് ഏകോപിപ്പിക്കും. താലൂക്ക് അടിസ്ഥാനത്തില് 24 മണിക്കൂര് കണ്ട്രോള് റൂമുകളും തുറന്നിട്ടുണ്ട്.