കണ്ണൂർ : കണ്ണൂർ ആലക്കോട് ലോക്ഡൗൺ നിര്ദ്ദേശങ്ങള് ലംഘിച്ച് യാത്രക്കാരെ കുത്തിനിറച്ച് സർവ്വീസ് നടത്തിയ സ്വകാര്യ ബസ് പോലീസ് കസ്റ്റഡിയിലെടുത്തു. മണക്കടവ്-തളിപ്പറമ്പ് റൂട്ടിൽ സർവ്വീസ് നടത്തുന്ന ദ്വാരക ബസാണ് ആലക്കോട് ടൗണിൽ വെച്ച് പോലീസ് പിടികൂടി കസ്റ്റഡിയിലെടുത്തത്. വയോധികർ ഉൾപ്പെടെ അമ്പതിലധികം യാത്രക്കാർ ബസിലുണ്ടായിരുന്നതായി പോലീസ് കണ്ടെത്തി. ബസ് ജീവനക്കാർക്കെതിരെ കേസെടുത്തു. ലോക്ഡൗൺ ഇളവുകളുടെ ഭാഗമായി സംസ്ഥാനത്ത് കര്ശന നിര്ദേശങ്ങളുടെ അടിസ്ഥാനത്തില് ബസ് സര്വ്വീസ് പുന:രാരംഭിച്ചിട്ടുണ്ട്. ജില്ലയ്ക്കകത്ത് ഹോട്ട്സ്പോട്ടുകൾ ഒഴികെയുളള മേഖലയിലാണ് ബസുകൾ ഓടുക. ടിക്കറ്റ് നിരക്ക് 50 ശതമാനം കൂടിയിട്ടുണ്ട് എന്നാൽ പകുതി യാത്രക്കാരെ മാത്രമേ ബസിൽ കയറ്റാൻ പാടുള്ളു എന്നാണ് നിര്ദ്ദേശം നല്കിയട്ടുള്ളത്. ഈ നിര്ദ്ദേശം ലംഘിച്ചാണ് കണ്ണൂരിൽ ബസ് സർവ്വീസ് നടത്തിയത്.
