പത്തനംതിട്ട : തദ്ദേശസ്വയംഭരണ സ്ഥാപനങ്ങളിലേക്കുള്ള ഉപതെരഞ്ഞെടുപ്പുമായി ബന്ധപ്പെട്ട് ഉദ്യോഗസ്ഥര്, രാഷ്ട്രീയപാര്ട്ടി പ്രതിനിധികള് എന്നിവരുടെ യോഗം ജില്ല കളക്ടര് എ.നിസാമുദ്ദീന്റെ അധ്യക്ഷതയില് കളക്ടറേറ്റ് പമ്പ കോണ്ഫറന്സ് ഹാളില് ചേര്ന്നു. ഉപതെരഞ്ഞെടുപ്പ് സുതാര്യവും സുഗമമായും നടത്തുന്നതിന് ഉദ്യോഗസ്ഥര് ശ്രദ്ധിക്കണമെന്ന് ജില്ല കളക്ടര് നിര്ദ്ദേശം നല്കി. ജില്ലയിലെ കുന്നന്താനം ഗ്രാമപഞ്ചായത്തിലെ വാര്ഡ് രണ്ട് വള്ളോക്കുന്ന്, കുറ്റൂര് ഗ്രാമപഞ്ചായത്തിലെ വാര്ഡ് എട്ട് ഓതറ, റാന്നി ഗ്രാമപഞ്ചായത്തിലെ വാര്ഡ് 14 ബ്ലോക്കുപടി, അരുവാപ്പുലം ഗ്രാമപഞ്ചായത്തിലെ വാര്ഡ് ആറ് കല്ലേലി എന്നിവിടങ്ങളില് സെപ്റ്റംബര് 28 ന് ഉപതിരഞ്ഞെടുപ്പ് നടക്കും.
രാവിലെ ഏഴ് മുതല് വൈകിട്ട് ആറുവരെയാണ് വോട്ടെടുപ്പ്. വള്ളോക്കുന്ന് വാര്ഡില് വള്ളോക്കുന്ന് സര്ക്കാര് എല്.വി എല്.പി.എസ്, ഓതറ വാര്ഡില് എ.എം.എം ഹൈസ്കൂള്, റാന്നി ബ്ലോക്കുപടി വാര്ഡില് തോട്ടമണ് ഫാദേഴ്സ് ഹൗസ് ഇന്റര്നാഷണല്, കല്ലേലി വാര്ഡില് ജി.ജെ.എം യു.പി.എസ് എന്നിവടങ്ങളിലാണ് പോളിംഗ് സ്റ്റേഷനുകള്. സെപ്റ്റംബര് 10 വരെ നാമനിര്ദേശ പത്രിക സമര്പ്പിക്കാം. സെപ്റ്റംബര് 14 ആണ് സ്ഥാനാര്ത്ഥിത്വം പിന്വലിക്കാനുള്ള അവസാന തീയതി. വോട്ടെണ്ണല് സെപ്റ്റംബര് 29ന് രാവിലെ 10 ന് ആരംഭിക്കും.
സെപ്റ്റംബര് ഒന്നു മുതല് തെരഞ്ഞെടുപ്പ് നടക്കുന്ന പഞ്ചായത്തുകളില് മാതൃകാ പെരുമാറ്റച്ചട്ടം പ്രാബല്യത്തിലുണ്ട്. തെരഞ്ഞെടുപ്പ് വിഭാഗം ഡെപ്യൂട്ടി കളക്ടര് കെ.എച്ച് മുഹമ്മദ് നവാസ്, ജില്ല ഇന്ഫര്മേഷന് ഓഫീസര് കെ.കെ ജയകുമാര്, റീജിയണല് ട്രാന്സ്പോര്ട്ട് ഓഫീസര് സി.ശ്യാം, പോലീസ് സ്പെഷ്യല് ബ്രാഞ്ച് ഡി.വൈ.എസ്.പി രവി സന്തോഷ്, ഉപതെരഞ്ഞെടുപ്പ് നടക്കുന്ന ഗ്രാമപഞ്ചായത്തുകളിലെ വരണാധികാരി, ഉപവരണാധികാരി, ഇലക്ടറല് രജിസ്ട്രേഷന് ഓഫീസര്മാര്, ഉദ്യോഗസ്ഥര്, രാഷ്ട്രീയപാര്ട്ടി പ്രതിനിധികള് തുടങ്ങിയവര് പങ്കെടുത്തു.
