പത്തനംതിട്ട : ജില്ലയില് തദ്ദേശ സ്വയംഭരണ സ്ഥാപനങ്ങളിലേക്കുള്ള ഉപതെരഞ്ഞെടുപ്പ് ഫെബ്രുവരി 24ന് നടത്തുമെന്ന് തെരഞ്ഞെടുപ്പ് വരണാധികാരിയായ ജില്ലാ കളക്ടര് എസ്. പ്രേംകൃഷ്ണന് അറിയിച്ചു. പത്തനംതിട്ട മുനിസിപ്പാലിറ്റിയിലെ കുമ്പഴ നോര്ത്ത് വാര്ഡ്, അയിരൂര് ഗ്രാമപഞ്ചായത്തിലെ തടിയൂര്, പുറമറ്റം ഗ്രാമപഞ്ചായത്തിലെ ഗ്യാലക്സി നഗര് വാര്ഡുകളിലുമാണ് തെരഞ്ഞെടുപ്പ്. മൂന്നും സ്ത്രീ സംവരണ മണ്ഡലമാണ്. അന്തിമ സമ്മതിദായക പട്ടിക പ്രസിദ്ധീകരിച്ചിട്ടുണ്ട്. നാമനിര്ദേശ പത്രിക ഫെബ്രുവരി ആറു വരെ സമര്പ്പിക്കാം. ഏഴിനാണ് സൂക്ഷ്മ പരിശോധന. സ്ഥാനാര്ത്ഥിത്വം പിന്വലിക്കാനുള്ള അവസാന തീയതി ഫെബ്രുവരി 10.
വോട്ടെടുപ്പ് ഫെബ്രുവരി 24 ന് നടക്കും. പോളിംഗ് രാവിലെ ഏഴു മുതല് വൈകിട്ട് ആറു വരെയാണ്. വോട്ടെണ്ണല് 25 ന് രാവിലെ 10 മണിക്ക് ആരംഭിക്കും. ഗ്രാമപഞ്ചായത്ത് വാര്ഡുകളില് മല്സരിക്കാന് 2000 രൂപയും മുനിസിപ്പല് വാര്ഡുകളില് 4000 രൂപയുമാണ് സ്ഥാനാര്ത്ഥികള് കെട്ടിവയ്ക്കേണ്ട തുക. പട്ടിക വിഭാഗക്കാര്ക്ക് നിശ്ചിത തുകയുടെ 50 ശതമാനം മതിയാകും. പ്രചാരണത്തിനുള്ള പരമാവധി തുകവിനിയോഗം ഗ്രാമപഞ്ചായത്ത് വാര്ഡുകളില് 25,000 രൂപയും മുനിസിപ്പല് വാര്ഡുകളില് 75,000 രൂപയുമാണ്.
