പാലക്കാട് : സിപിഎം പ്രാദേശിക നേതാവ് ഷാജഹാന്റെ കൊലപാതകത്തില് പാര്ട്ടിക്ക് പങ്കില്ലെന്ന് ബിജെപി സംസ്ഥാന സെക്രട്ടറി സി കൃഷ്ണകുമാര്. കൊലയാളികള്ക്ക് ബിജെപിയുമായോ ആര് എസ് എസുമായോ യാതൊരു ബന്ധവുമില്ല. കൃത്യത്തിന് പിന്നില് സിപിഎമ്മിന്റെ മാഫിയയോ മയക്കുമരുന്ന് സംഘമോ ആകാമെന്ന് അദ്ദേഹം പറഞ്ഞു.
ബിജെപി ആര് എസ് എസ് പ്രവര്ത്തകര് സിപിഎം ശക്തി കേന്ദ്രത്തിലുള്ള വീട്ടില്പ്പോയി ഷാജഹാനെ ഭീഷണിപ്പെടുത്തിയെന്ന് പറയുന്നത് കല്ലുവെച്ച നുണയാണ്. മലമ്പുഴ എംഎല്എയും സിപിഎം നേതാക്കളും പറഞ്ഞ് പഠിപ്പിച്ച കാര്യങ്ങളാണ് കുടുംബം പറയുന്നതെന്നും കൃഷ്ണകുമാര് ആരോപിച്ചു.
ഷാജഹാന്റെ കൊലപാതകത്തിന് പിന്നില് ബിജെപിയാണെന്നാണ് കുടുംബത്തിന്റെ ആരോപണം.
കേസിലെ പ്രതികളായ അനീഷും ശബരീഷും നവീനും വെട്ടിക്കൊലപ്പെടുത്തുമെന്ന് പറഞ്ഞ് രണ്ട് ദിവസം മുമ്പ് ഷാജഹാനെ ഭീഷണിപ്പെടുത്തിയിരുന്നെന്നും ബി ജെ പി നേതാക്കളുടെ സഹായമില്ലാതെ കൃത്യം നടത്താന് സാധിക്കില്ലെന്നും ബന്ധുക്കള് ആരോപിച്ചിരുന്നു. കേസില് ആകെ എട്ട് പ്രതികളാണ് ഉള്ളത്. ഇതില് മൂന്നാം പ്രതി നവീനെയും അഞ്ചാം പ്രതി സിദ്ധാര്ത്ഥിനെയും പോലീസ് പിടികൂടിയിട്ടുണ്ട്. ഒരാളെ പൊള്ളാച്ചിയില് നിന്നും മറ്റേയാളെ പട്ടാമ്പിയില് നിന്നുമാണ് പിടികൂടിയത്.
