പത്തനംതിട്ട : കുമ്പഴ – മൈലപ്ര റോഡില് കുമ്പഴ വടക്ക് ഇലക്ട്രിക് പോസ്റ്റില് സ്ഥാപിച്ചിരുന്ന കേബിളിന് തീ പിടിച്ചു. കഴിഞ്ഞ രാത്രിയാണ് സംഭവം. പോസ്റ്റില് സ്ഥാപിച്ചിരുന്ന എല്.റ്റി ലൈന് കേബിളിനാണ് തീ പടര്ന്നുപിടിച്ചത്. വലിയ തോതില് തീ ഉയര്ന്നതിനെ തുടര്ന്ന് പത്തനംതിട്ടയില് നിന്നും ഫയര് ഫോഴ്സ് എത്തി തീ അണയ്ക്കുകയായിരുന്നു. ഫയര് എക്സ്റ്റിങ്ങുഷറും ഫയര് ടെണ്ടര് വാഹനവും ഉപയോഗിച്ചാണ് തീ അണച്ചത്. കൃത്യ സമയത്ത് ഇടപെടല് നടന്നതിനാല് തീ കൂടുതല് ഭാഗത്തേക്ക് പടരാതെ വലിയ ദുരന്തം ഒഴിവാകുകയായിരുന്നു.
പത്തനംതിട്ട നഗരത്തിലെ ഇലക്ട്രിക് പോസ്റ്റുകളില് സ്ഥാപിച്ചിട്ടുള്ള കേബിളുകള് വലിയ അപകടമാണ് വരുത്തിവെക്കുന്നത്. കെ.എസ്.ഇ.ബി യുടെ കേബിളുകളും ടെലഫോണ് കേബിളുകളും ചാനല് കേബിളുകളും അടക്കം അലക്ഷ്യമായി ഇട്ടിരിക്കുന്നതും അപകടരമായ രീതിയില് കെട്ടിവെച്ചിരിക്കുന്നതും കാണാം. ഇതില് ചെറിയ ഒരു തീ പിടുത്തമുണ്ടായാല് പോലും ഇത് വലിയ ദുരന്തത്തിന് കാരണമാകും. ഇത് നീക്കം ചെയ്യാന് അടിയന്തിര ഇടപെടല് ആവശ്യമാണ്.
