കണ്ണൂർ : കതിരൂരിൽ എർത്ത് കമ്പിയിൽ നിന്ന് വൈദ്യുതാഘാതമേറ്റ് കെ.എസ്.ഇ.ബി ജീവനക്കാരന് ദാരുണാന്ത്യം. കരാർ ജീവനക്കാരനായ കുണ്ടുചിറ പഞ്ചാര ഹൗസിൽ എ. രാജൻ ആണ് മരിച്ചത്. 60 വയസായിരുന്നു. ചൊവ്വാഴ്ച രാത്രി 9.30-ഓടെയാണ് അപകടം ഉണ്ടായത്. പൊന്ന്യം പറാംകുന്നിലെ 110 കെ.വി. സബ്സ്റ്റേഷന് സമീപത്തെ വൈദ്യുതിത്തൂണിൽ നിന്ന് തീ പടരുന്നത് ശ്രദ്ധയിൽപ്പെട്ട നാട്ടുകാർ സബ്സ്റ്റേഷനിൽ വിവരം അറിയിക്കുകയായിരുന്നു. തുടർന്ന് തലശ്ശേരി സെക്ഷനിലെ ജീവനക്കാർ എത്തി തീ അണയ്ക്കാൻ ശ്രമം നടത്തുന്നതിനിടെയാണ് ദാരുണ സംഭവം ഉണ്ടായത്.
തീ അണയ്ക്കാനുള്ള പരിശോധനയ്ക്കിടെ രാജൻ ഹൈടെൻഷൻ വൈദ്യുതിക്കമ്പിയോട് ചേർന്നുള്ള എർത്ത് കമ്പിയിൽ അറിയാതെ ചവിട്ടിയതോടെയാണ് വൈദ്യുതാഘാതമേറ്റത്. രാജൻ തെറിച്ചുവീഴുകയും കൈയിലടക്കം ചില ഭാഗങ്ങളിൽ മാരകമായി പൊള്ളലേൽക്കുകയും ചെയ്തു. സംഭവസ്ഥലത്ത് വെച്ചുതന്നെ രാജൻ മരിച്ചതായി ആശുപത്രി അധികൃതർ അറിയിച്ചു. ഭാര്യ – സിന്ധു. മകൾ – അനുവർഷ. സഹോദരങ്ങൾ – രതീശൻ, രഞ്ജിത്ത്, രാഗേഷ്, രജിത, രേഷ്മ.
