തിരുവനന്തപുരം: നഗരത്തിൽ കുടിവെള്ള വിതരണത്തിനായി കോർപറേഷൻ മുൻ ഭരണസമിതി സ്ഥാപിച്ച കിയോസ്കുകൾ പലതും പ്രവർത്തനരഹിതമാണ്. കടുത്ത വേനലിൽ കുടിവെള്ളം തേടിയെത്തുന്നവർ വെള്ളം കിട്ടാതെ മടങ്ങുകയാണ്. ലക്ഷങ്ങൾ മുടക്കി സ്ഥാപിച്ച കിയോസ്കുകൾ ആവശ്യ സമയത്ത് ഉപകരിക്കാത്ത കാഴ്ചയാണ് നഗരത്തിൽ കാണാനാവുക. തിരുവനന്തപുരം കോർപ്പറേഷനിലെ കുടിവെള്ളക്ഷാമത്തിൽ മേയറുടെ വാദം പരിഹാസ്യമെന്ന് വി.കെ പ്രശാന്ത് എംഎൽഎ. കുടിവെള്ളം എത്തിക്കുന്നതിൽ പൂർണ ഉത്തരവാദിത്വം കോർപ്പറേഷന് ഉണ്ട്.
മുൻ ഭരണസമിതിയുടെയും ജീവനക്കാരുടെയും തലയിൽ ഉത്തരവാദിത്വം വെച്ചുകെട്ടി ബിജെപി ഭരണസമിതിക്ക് ഒഴിഞ്ഞുമാറാൻ കഴിയില്ലെന്നും വി.കെ പ്രശാന്ത് പറഞ്ഞു. കുടിവെള്ളക്ഷാമത്തിൽ കോർപ്പറേഷന് ഉത്തരവാദിത്തം ഇല്ലെങ്കിൽ മേയർ ഉൾപ്പെടെ രാജി വെയ്ക്കുന്നതാണ് നല്ലത്. കാലാ കാലങ്ങളിൽ കോർപറേഷൻ ഇത്തരം പ്രശ്നങ്ങളിൽ ഇടപെട്ടിട്ടുണ്ട്. മുൻകാല ഭരണസമിതികൾ കൃത്യമായി ഇടപ്പെട്ടിട്ടുണ്ടെന്നും വി.കെ പ്രശാന്ത് പറഞ്ഞു.
