തിരുവല്ല : തിരുവല്ലയിലെ കോട്ടാലിയിൽ കഞ്ചാവ് മാഫിയ നടത്തിയ ആക്രമണത്തിൽ വീടും വാഹനങ്ങളും അടിച്ചു തകർത്തു. ആക്രമണത്തിൽ തകർന്ന കിടപ്പുമുറിയുടെ ജനൽച്ചില്ലകൾ വീണ് രണ്ട് വയസുകാരന് പരിക്കേറ്റു.
കോട്ടാലി പുത്തൻ പറമ്പിൽ ലിസമ്മ തോമസിന്റെ വീടിന് നേരെയാണ് ആക്രമണം നടന്നത്. ലിസമ്മയുടെ മകൻ ലിജോയുടെ ഉടമസ്ഥതയിലുള്ള ഓട്ടോ റിക്ഷയും പെട്ടി ഓട്ടോ റിക്ഷയും സംഘം അടിച്ചു തകർത്തു.
തിങ്കളാഴ്ച പുലർച്ചെ മൂന്ന് മണിയോടെ ആയിരുന്നു സംഭവം. രണ്ട് ബൈക്കുകളിലും ഓട്ടോ റിക്ഷയിലുമായി എത്തിയ സംഘം വീടിനും വാഹനങ്ങൾക്കും നേരേ ആക്രമണം അഴിച്ചു വിടുകയായിരുന്നു. വീടിന്റെ ഹാളിൽ ഉറങ്ങുകയായിരുന്ന ലിസമ്മ സിറ്റൗട്ടിലെ ലൈറ്റ് ഇട്ടപ്പോഴേക്ക് ആക്രമി സംഘം രക്ഷപെട്ടു. ലിസമ്മയുടെ ചെറുമകനായ ഏദനാണ് പരിക്കേറ്റത്. സംഭവത്തിൽ തിരുവല്ല പോലീസ് കേസെടുത്ത് അന്വേഷണം ആരംഭിച്ചു.