അരൂര് : എരമല്ലൂരില് സ്റ്റേറ്റ് എക്സൈസ് എന്ഫോഴ്സ്മെന്റ് സ്ക്വാഡിന്റെ വന് കഞ്ചാവ് വേട്ട. ചേര്ത്തല – അരൂര് ദേശീയപാതയില് എരമല്ലൂര് ഭാഗത്ത് സ്റ്റേറ്റ് എക്സൈസ് എന്ഫോഴ്സ്മെന്റ് സ്ക്വാഡിന്റെ പരിശോധനയില് ഹൈടെക് ലോറിയില് കടത്തിക്കൊണ്ടുവന്ന 125 കിലോഗ്രാം കഞ്ചാവ് പിടിച്ചെടുത്തു.
ആന്ധ്രയില്നിന്ന് കഞ്ചാവും ഹാഷിഷ് ഓയിലും അടക്കം വിവിധയിനം മയക്കുമരുന്നുകള് മറ്റ് ലോഡിന്റെ മറവില് കടത്തിക്കൊണ്ടുവന്ന് കോഴിക്കോട്, മലപ്പുറം ജില്ലകളില് വിതരണം ചെയ്തുവന്നിരുന്ന പ്രധാനകണ്ണികളായ കോഴിക്കോട് ഫാറൂഖ് പേട്ട കളത്തിങ്കല് വീട്ടില് മുഹമ്മദ് ജംഷീര് (30), കോഴിക്കോട് കല്ലായി കട്ടയത്തുപറമ്പില് ദേശത്ത് സക്കീന മന്സിലില് സുഹൂരിശ് (26) എന്നിവരാണ് പിടിയിലായത്.
ഇവര്ക്ക് സാമ്പത്തിക സഹായം നല്കി സഹായിച്ച കോഴിക്കോട്, മലപ്പുറം ജില്ലയിലെ ആളുകളെക്കുറിച്ചും ഇവരില്നിന്ന് കഞ്ചാവ് വാങ്ങി വിതരണംചെയ്യുന്ന പ്രധാനികളെക്കുറിച്ചും വിവരം ലഭിച്ചിട്ടുണ്ട്. എക്സൈസ് സര്ക്കിള് ഇന്സ്പെക്ടര് ടി അനികുമാര്, സിഐ ജി കൃഷ്ണകുമാര്, ഇന്സ്പെക്ടര് എസ് മധുസൂദനന്നായര്, അസിസ്റ്റന്റ് എക്സൈസ് ഇന്സ്പെക്ടര് മനോജ്കുമാര്, പ്രിവന്റീവ് ഓഫീസര് പ്രജോഷ്കുമാര് തുടങ്ങിയവര് അന്വേഷകസംഘത്തിലുണ്ടായി.
