കണ്ണൂര്: പട്ടാപ്പകല് വ്യാപാരിയെ തട്ടിക്കൊണ്ടു പോകാന് ക്വട്ടേഷന് സംഘത്തിന് നേതൃത്വം നല്കിയത് 22കാരി. കഴിഞ്ഞ ദിവസമാണ് കണ്ണൂര് നഗരമധ്യത്തില് വ്യാപാരിയെ തട്ടിക്കൊണ്ടു പോകാനുള്ള ശ്രമം നടന്നത്. ക്വട്ടേഷന് വിവരമറിഞ്ഞു പോലീസ് സ്ഥലത്തെത്തി സംഘത്തെ വളഞ്ഞെങ്കിലും ഇവര് രക്ഷപെട്ടു. കാറില് രക്ഷപെട്ടവരില് യുവതിയുമുണ്ടായിരുന്നു. കണ്ണൂര് നഗരത്തിലെ താമസക്കാരിയാണു യുവതിയെന്നു പോലീസ് കണ്ടെത്തിയിട്ടുണ്ട്.
22കാരിയുടെ സഹോദരിയുടെ വിവാഹവുമായി ബന്ധപ്പെട്ട് ഓഡിറ്റോറിയത്തിനു വാടക ഇനത്തില് നല്കിയ തുകയില് 30,000 രൂപ തിരിച്ചു ലഭിക്കാത്തതിനെ ചൊല്ലി വ്യാപാരിയുമായി പ്രശ്നമുണ്ടായിരുന്നു. ഇതേ തുടര്ന്നാണ് പണം വാങ്ങാന് ചെന്നതാണെന്നും വെറുതെ ഭീഷണിപ്പെടുത്താനേ ഉദ്ദേശിച്ചിരുന്നുള്ളൂ എന്നുമാണു സംഘം മൊഴി നല്കിയത്. എന്നാല് 30000 രൂപയ്ക്കു വേണ്ടി മാത്രമായി ക്വട്ടേഷന് സംഘം പട്ടാപ്പകല് നഗരമധ്യത്തില് ആക്രമണത്തിന് ഇറങ്ങിയെന്ന മൊഴി പോലീസ് വിശ്വാസത്തിലെടുത്തിട്ടില്ല. ക്വട്ടേഷന് സംഘത്തില് ഉള്പ്പെട്ടവര്ക്കെതിരെ ഗുണ്ടാനിയമപ്രകാരം കേസെടുക്കാനാണു പോലീസിന്റെ തീരുമാനം.
