ഇടുക്കി : ഏലക്കയുടെ വില കുത്തനെ ഇടിഞ്ഞതോടെ പ്രതിസന്ധിയിലായിരിക്കുകയാണ് ഇടുക്കിയിലെ ഏലം കര്‍ഷകര്‍. മുന്‍ വര്‍ഷങ്ങളെ അപേക്ഷിച്ച്‌ ഉല്‍പാദനത്തില്‍ വര്‍ധനവുണ്ടെങ്കിലും വിലസ്ഥിരതയില്ലാത്തതും ഉല്‍പ്പാദനച്ചിലവ് വര്‍ധിച്ചതും കര്‍ഷകരുടെ പ്രതീക്ഷകള്‍ക്ക് തിരിച്ചടിയായി. കഴിഞ്ഞവര്‍ഷം കേരളത്തില്‍ 39143 ഹെക്ടര്‍ സ്ഥലത്തായി 20570 ടണ്‍ ഏലം ഉല്‍പ്പാദിപ്പിച്ചെന്നാണ് സ്‌പൈസസ് ബോര്‍ഡിന്റെ കണക്ക്. ഉല്‍പാദനം കൂടിയെങ്കിലും ശരാശരി 5000 രൂപയുണ്ടായിരുന്ന ഏലത്തിന്റെ വില 700 ലേക്ക് കൂപ്പുകുത്തി.
സ്‌പൈസസ് ബോര്‍ഡിന്റെ കണക്ക് പ്രകാരം ഏലം നടുന്നതിനും പരിപാലിക്കുന്നതിനുമായി 616046 രൂപയും 835 തൊഴിലാളികളുടെ സേവനവും വേണ്ടി വരും. എന്നാല്‍ ഇതിനുമപ്പുറമാണ് ഇന്നത്തെ ഉല്‍പാദനച്ചെലവെന്ന് കര്‍ഷകര്‍ പറയുന്നു. ഒരു ചെടിയില്‍ നിന്ന് ഒരു കിലോ കായയും ആറ്കിലോ പച്ചക്കായയില്‍ നിന്ന് ഒരു കിലോ ഉണക്കക്കായയും ലഭിക്കുമെന്നാണ് കണക്ക്. പ്രതിവര്‍ഷം ഏഴ് തവണ വരെ വിളവെടുക്കാം. പ്രതികൂല കാലാവസ്ഥയും കീടബാധയും വന്യമൃഗശല്യവും അതിജീവിച്ച്‌ കൃഷിയിറക്കിയാലും കിലോയ്ക്ക് 1500 രൂപയെങ്കിലും കിട്ടിയാലെ കര്‍ഷകര്‍ക്ക് പിടിച്ചു നില്‍ക്കാനാകൂ.
