ന്യൂഡൽഹി : സി.ബി.എസ്.ഇ. 10, 12 ക്ലാസുകളിലെ ടേം ഒന്ന് ബോർഡ് പരീക്ഷകളുടെ മൂല്യനിർണയം, പരീക്ഷ നടക്കുന്ന അതേദിവസംതന്നെ നടത്തുമെന്ന് സി.ബി.എസ്.ഇ. ഓഫ് ലൈനായി നടക്കുന്ന 90 മിനിറ്റ് ദൈർഘ്യമുള്ള പരീക്ഷയിൽ ഒബ്ജക്ടീവ് ടൈപ്പ് ചോദ്യങ്ങളാണുള്ളത്. ഒ.എം.ആർ. ഷീറ്റിലാണ് പരീക്ഷ എഴുതുന്നത്. പരീക്ഷ കഴിഞ്ഞദിവസംതന്നെ മൂല്യനിർണയം നടത്താനാണ് ബോർഡിന്റെ തീരുമാനം. ഇതുസംബന്ധിച്ച് സ്കൂളുകൾക്കും അധ്യാപകർക്കും നിർദേശം നൽകി.
ആദ്യം ടേം പരീക്ഷ കഴിഞ്ഞമാസം ആരംഭിച്ചു. രണ്ടാമത്തെ ടേം പരീക്ഷ അടുത്ത മാർച്ചിൽ ആരംഭിക്കും. ഇതിൽ ഒബ്ജക്ടീവ് ടൈപ്പും വിവരണാത്മക രീതിയിലുമുള്ള ചോദ്യങ്ങളുമായിരിക്കും. കോവിഡ് പ്രതിസന്ധി രൂക്ഷമായതിനെ തുടർന്ന് കഴിഞ്ഞ വർഷം സി.ബി.എസ്.ഇ. 10, 12 പരീക്ഷകൾ റദ്ദാക്കിയിരുന്നു. സമാനസാഹചര്യം ഒഴിവാക്കാനാണ് ഇത്തവണ രണ്ട് ടേം പരീക്ഷകൾ നടത്തുന്നത്.