ഡല്‍ഹി : ഭാവി കലാകാരന്‍മാരെ വളര്‍ത്തിയെടുക്കാനും കുട്ടികള്‍ക്ക് കലയോട് താത്പര്യം ഉണ്ടാക്കാനും ഒന്നു മുതല്‍ പത്തുവരെ ക്ലാസുകളിലെ വിദ്യാര്‍ത്ഥികള്‍ക്ക് കലാസംയോജിത പ്രോജക്ടുമായി സിബിഎസ്ഇ വരുന്നു. മറ്റൊരു സംസ്ഥാനത്തെ കലയെപ്പറ്റി ഉള്‍പ്പെടെ ആധികാരികമായി പഠിപ്പിക്കുകയാണ് ലക്ഷ്യം. ദൃശ്യ, സ്റ്റേജ് ഇന കലാരൂപങ്ങളുടെ പ്രോജക്ടുകള്‍ കുട്ടികള്‍ തയ്യാറാക്കണം. ഒന്നുമുതല്‍ എട്ടുവരെ ക്ലാസുകള്‍ക്ക് ഇത് നിര്‍ബന്ധമല്ല. പഠനം ആനന്ദപ്രദമാക്കാനും ഇന്ത്യയുടെ കലാ സാംസ്‌കാരിക പാരമ്പര്യത്തെക്കുറിച്ച്‌ വിദ്യാര്‍ത്ഥികളെ ബോധവാന്മാരാക്കാനുമാണ് പഠനം.
ഓരോ സംസ്ഥാനത്തിനും പങ്കാളിത്ത സംസ്ഥാനങ്ങളെ നിശ്ചയിച്ചു. കേരളത്തിന്റെ പങ്കാളി ഹിമാചല്‍പ്രദേശാണ്. കലാസംയോജിത പ്രോജക്ടുകളില്‍ ഒന്ന് പങ്കാളിത്ത കലാരൂപങ്ങളുമായി ബന്ധപ്പെടുത്തിയുള്ളതാകണം. കേരളത്തിലെ വിദ്യാര്‍ത്ഥികളുടെ ഒരു പ്രോജക്‌ട് ഹിമാചല്‍പ്രദേശിലെ ഏതെങ്കിലും കലാരൂപവുമായി ബന്ധപ്പെടുത്തിയുള്ളതായിരിക്കണം. പ്രോജക്ടുകള്‍ ഇന്റേണല്‍ വിലയിരുത്തലിന് പരിഗണിക്കും.വിഷയം പഠിപ്പിക്കുന്നവരും കലാ അദ്ധ്യാപകരും വിദ്യാര്‍ത്ഥികള്‍ക്ക് മാര്‍ഗനിര്‍ദ്ദേശം നല്‍കണം. കലാസംയോജിത പഠനം എന്നിവ റിപ്പോര്‍ട്ടു ചെയ്യാന്‍ സ്‌കൂളുകള്‍ക്കായി ഒരു പോര്‍ട്ടലും സിബിഎസ്ഇ ആരംഭിച്ചു. ഇതുസംബന്ധിച്ച്‌ മാര്‍ഗരേഖയും ബോര്‍ഡ് പുറത്തിറക്കി.
