വൈക്കം : ഒന്നര ലക്ഷത്തിലധികം രൂപ വിലവരുന്ന രണ്ട് ഗര്ഭിണിപ്പശുക്കളെ മോഷ്ടിച്ച് കടത്തിയ കേസിലെ പ്രതികളെ പോലീസ് അറസ്റ്റ് ചെയ്തു. വൈക്കം കൊടിയാട് പുത്തന്പുരയില് രാജഗോപാലന് – സുജാത ദമ്പതികളുടെ പശുക്കളെ വാഴമന കൊടിയാടു ഭാഗത്തെ റോഡരികില്നിന്ന് മോഷ്ടിച്ച കേസില് രാജഗോപാലിന്റെ ബന്ധുക്കളായ ചെമ്പ് വാഴേകാട് സ്വദേശി വാസുദേവന് (57) ഉദയനാപുരം പടിഞ്ഞാറെക്കര സ്വദേശി അനൂപ് എന്നിവരെയാണ് എസ്.ഐ അജ്മല് ഹുസൈന് അറസ്റ്റ്ചെയ്തത്. കഴിഞ്ഞദിവസം രാത്രി ഉള്പ്രദേശത്തെ വിജനമായ വഴികളിലൂടെ പശുക്കളെ കടത്തിക്കൊണ്ടുപോയ പ്രതികള് പശുക്കളെ വില്ക്കാന് ശ്രമിക്കുന്നതിനിടെ പോലീസ് കുടുക്കുകയായിരുന്നു.
പശുക്കളെ വളര്ത്തി ഉപജീവനം കഴിച്ചുവെന്ന കുടുംബം പശുക്കള് അപഹരിക്കപ്പെട്ടതോടെ കടുത്ത പ്രതിസന്ധിയിലായി. മോഷ്ടാക്കളെ പിടികൂടാനായി പോലീസിന്റെ കൂട്ടായ നീക്കത്തിലാണ് പ്രതികള് പിടിയിലായത്. പശുവിന്റെ ഉടമസ്ഥനായ രാജഗോപാലും ബന്ധുക്കളുമായി കുറച്ചു കാലമായി കലഹത്തിലായിരുന്നു. സാമ്പത്തിക കാര്യങ്ങളെക്കുറിച്ചും ഇവര് തമ്മില് ഭിന്നതയുണ്ടായിരുന്നു. ഈ വിരോധത്തിന്റെ ഭാഗമായാണ് പശുക്കളെ മോഷ്ടിച്ചു കൊണ്ടുപോയി ഇവര് വില്ക്കാന് തുനിഞ്ഞതെന്ന് പോലീസ് പറഞ്ഞു. കോടതിയില് ഹാജരാക്കിയ പ്രതികളെ റിമാന്ഡ് ചെയ്തു.
