ചെങ്ങന്നൂര് : ചെങ്ങന്നൂര് ദേവി തൃപ്പൂത്തായി. ആറാട്ട് ശനിയാഴ്ച രാവിലെ 7.30 പമ്പാനദിയിലെ മിത്രപ്പുഴ കടവില് നടക്കും. മലയാളവര്ഷത്തിലെ ആറാമത്തെ തൃപ്പൂത്താണിത്. ചടങ്ങുകൾക്ക് താഴ്മൺ തന്ത്രികൾ കണ്ട്ഠരര് മോഹനര് മുഖ്യകാർമ്മികത്വം വഹിക്കും. കൊവിഡ് മാനദണ്ഡം അനുസരിച്ച് ആറാട്ട് കടവിലെയും ,ആറാട്ടെഴുന്നള്ളിപ്പ് കടന്നു വരുന്ന വഴികളിലെയും കിഴക്കേ ആനക്കൊട്ടിലിലെയും നിറപറ, താലപ്പൊലി വഴിപാടുകൾ ഒഴിവാക്കിയിട്ടുണ്ട്. ആറാട്ട് ഘോഷയാത്ര ക്ഷേത്രത്തിന്റെ പടിഞ്ഞാറേ നടയിലെത്തിയശേഷം പ്രത്യേകം സജ്ജമാക്കിയ മണ്ഡപത്തിൽ ഭക്തർക്ക് മഞ്ഞൾപ്പറ, നെൽപ്പറ സമർപ്പണം നടത്താം. തുടർന്ന് പ്രദക്ഷിണം പൂർത്തിയാക്കി ശ്രീകോവിലിലേക്ക് ആനയിക്കും. പിന്നീട് ഇരുനടകളിലും കളഭാഭിഷേകവും വിശേഷാല്പൂജകളും നടക്കും. ആറാട്ടുദിവസം മുതല് 12 ദിവസത്തേക്ക് ക്ഷേത്രത്തിലെ വിശേഷാല് വഴിപാടായ ഹരിദ്രപുഷ്പാഞ്ജലി നടത്താനുള്ള സൗകര്യം ഉണ്ടായിരിക്കുമെന്ന് അഡ്മിനിസ്ട്രേറ്റീവ് ആഫീസർ വി.ജി പ്രകാശ് അറിയിച്ചു.
