എരുമേലി : സ്വകാര്യ പണമിടപാട് സ്ഥാപനത്തിലെ ജീവനക്കാരന്റെ മാല മോഷ്ടിക്കാന് ശ്രമിച്ച രണ്ട് പ്രതികള് പിടിയില്. എരുമേലി ആറ്റാത്തറയില് മുനീര് (32), എരുമേലി നെല്ലിത്താനം മുബാറക്ക് എ. റഫീഖ് (24) എന്നിവരെയാണ് എരുമേലി പോലീസ് അറസ്റ്റ് ചെയ്തത്. ഇവര് കഴിഞ്ഞദിവസം എരുമേലിയിലെ സ്വകാര്യ പണമിടപാട് സ്ഥാപനത്തിലെ ജീവനക്കാരനായ വിനീഷ് എന്നയാളുടെ മാലയാണ് മോഷ്ടിക്കാന് ശ്രമിച്ചത്. പ്രതികള് രണ്ടുപേരും ചേര്ന്ന് ഇയാള് ജോലിചെയ്യുന്ന സ്ഥാപനത്തിലേക്ക് വൈകിട്ട് പണമിടപാട് നടത്താനെന്ന വ്യാജേന എത്തുകയും കൗണ്ടറില് ഇരുന്ന വിനീഷിന്റെ കൈയില് ബലമായി പിടിച്ചതിനുശേഷം മാല പൊട്ടിച്ചെടുക്കാന് ശ്രമിക്കുകയുമായിരുന്നു.
ബഹളംകേട്ട് സഹപ്രവര്ത്തകര് വന്നപ്പോഴേക്കും പ്രതികള് സ്ഥാപനത്തില്നിന്ന് കടന്നുകളഞ്ഞു. വിനീഷിന്റെ പരാതിയുടെ അടിസ്ഥാനത്തില് ജില്ല പോലീസ് മേധാവിയുടെ നേതൃത്വത്തിലുള്ള അന്വേഷണസംഘം രണ്ടു പ്രതികളെയും മണിക്കൂറുകള്ക്കകം പിടികൂടി. പ്രതികളില് ഒരാളായ മുബാറക്കിന് എരുമേലി സ്റ്റേഷനില് തന്നെ വധശ്രമം, അടിപിടി തുടങ്ങി ഏഴ് കേസുകളും മുനീറിന് എരുമേലി, വെച്ചൂച്ചിറ, തൃക്കാക്കര സ്റ്റേഷനുകളിലും കേസുകള് നിലവിലുണ്ട്. എരുമേലി എസ്.എച്ച്.ഒ അനില് കുമാര്, എസ്.ഐമാരായ എം.എസ്. അനീഷ്, അസീസ്, സുരേഷ് ബാബു, എ.എസ്.ഐ രാജേഷ്, സി.പി.ഒ മനോജ് കുമാര് എന്നിവരാണ് അന്വേഷണ സംഘത്തിലുണ്ടായിരുന്നത്.
