കൊല്ലം : കെഎസ്ആര്ടിസി ബസിനുള്ളില് വെച്ച് വീട്ടമ്മയുടെ മാല മോഷ്ടിച്ച് ഓടി രക്ഷപ്പെടാന് ശ്രമിച്ച നാടോടി യുവതി അറസ്റ്റില്. തമിഴ്നാട് തിരുനെല്വേലി ജില്ലയിലെ കോവില്പെട്ടി രാജഗോപാല് നഗറില് അറുമുഖന്റെ ഭാര്യ മീനാക്ഷിയാണ്(21) അറസ്റ്റിലായത്. പെരുമണ് പനയം സ്വദേശിനിയായ വീട്ടമ്മയുടെ മാലയാണ് മീനാക്ഷി മോഷ്ടിച്ചത്. എഴുകോണ് പോലീസാണ് യുവതിയെ അറസ്റ്റു ചെയ്തത്. കെ എസ് ആര് ടി സി ബസില് കൊട്ടാരക്കരയില് നിന്ന് കുണ്ടറയിലേക്ക് യാത്ര ചെയ്യുന്നതിനിടെ അമ്പലത്തുംകാല ജംഗ്ഷനില് എത്തിയപ്പോഴാണ് വീട്ടമ്മയുടെ കഴുത്തില് കിടന്ന സ്വര്ണമാല മോഷ്ടിക്കപ്പെട്ടത്.
രണ്ടു പവന് തൂക്കം വരുന്ന മാലയാണ് നഷ്ടപ്പെട്ടത്. അതിനിടെ തൊട്ടടുത്ത സ്റ്റോപ്പില് ബസ് നിര്ത്തിയപ്പോള് ഓടിരക്ഷപ്പെടാന് ശ്രമിച്ച മീനാക്ഷിയെ യാത്രക്കാരും നാട്ടുകാരും ചേര്ന്ന് പിടികൂടി പോലീസിന് കൈമാറുകയായിരുന്നു. എഴുകോണ് എസ്എച്ച് ഒ ശിവപ്രകാശിന്റെ നേതൃത്വത്തില് എസ്ഐമാരായ അനീസ്, ഉണ്ണികൃഷ്ണപിള്ള, ജയപ്രകാശ് , അടക അജിത്, സീനിയര് സിവില് പോലീസ് ഓഫീസര്മാരായ ജയ, അമ്പിളി എന്നിവരടങ്ങിയ പോലീസ് സംഘമാണ് പ്രതിയെ അറസ്റ്റ് ചെയ്തത്. അറസ്റ്റിലായ പ്രതിയെ കൊട്ടാരക്കര കോടതിയില് ഹാജരാക്കി റിമാന്ഡ് ചെയ്തു. കൂടുതല് അന്വേഷണത്തില് ഇവര് കൊടുവള്ളി, കുന്നമംഗലം, മലപ്പുറം, താമരശേരി തുടങ്ങിയ വിവിധ സ്റ്റേഷനുകളില് സമാനമായ നിരവധി കേസുകളില് പ്രതിയാണെന്ന് വ്യക്തമായിട്ടുള്ളതുമാണ്.
