ചാത്തന്നൂര്‍ : ചാത്തന്നൂരില്‍ വ്യാപക കവര്‍ച്ച. കഴിഞ്ഞ ദിവസം രാത്രിയില്‍ ചാത്തന്നൂരില്‍ വ്യാപകമായ കവര്‍ച്ച നടന്നു. ചാത്തന്നൂര്‍ പോസ്റ്റ് ഓഫിസ് ജംഗ്ഷന് സമീപമുള്ള ബി.എസ്.എന്‍.എല്‍ ഓഫിസ്, പോസ്റ്റ് ഓഫിസ്, വര്‍ക്ക്‌ഷോപ്പ്, ജനസേവനകേന്ദ്രം എന്നിവിടങ്ങളില്‍ മോഷണസംഘം കവര്‍ച്ച നടത്തി. വര്‍ക്ക് ഷോപ്പില്‍നിന്ന് 25000 രൂപ മോഷ്ടാക്കള്‍ അപഹരിച്ചു. കൃഷി ആവശ്യങ്ങള്‍ക്ക് ഉപയോഗിക്കുന്ന കുന്താലിയും വെട്ടുകത്തിയുമായാണ് സംഘം മോഷണം നടത്തിയത്.
പോസ്റ്റ് ഓഫിസ് ജംഗ്ഷന് സമീപമുള്ള വര്‍ക്ക്‌ഷോപ്പിന്‍റെ പൂട്ട് തകര്‍ത്ത് ഉള്ളില്‍ കയറിയ സംഘം ഗ്ലാസ്‌ തകര്‍ത്താണ് 25600 രൂപയും സ്പാനര്‍ ഉള്‍പ്പെടെയുള്ള ടൂള്‍സും അപഹരിച്ചത്. തൊട്ടടുത്ത ജനസേവന കേന്ദ്രത്തിന്‍റെയും പൂട്ട് തകര്‍ത്തെങ്കിലും ഒന്നും നഷ്ടപ്പെട്ടിട്ടില്ല.
പോസ്റ്റ് ഓഫിസിന്‍റെ ജനല്‍ കമ്പി വളച്ചൊടിച്ചാണ് ഉള്ളില്‍ കയറിയത്. ഡ്രോയറുകളും മറ്റും തുറന്ന് സാധനങ്ങളെല്ലാം വലിച്ചുവാരിയിട്ട നിലയിലാണ്. തുടര്‍ന്ന് ലോക്കറിന്‍റെ പൂട്ട് തുറക്കാന്‍ ശ്രമം നടത്തിയെങ്കിലും വിജയിച്ചില്ല. തുടര്‍ന്ന് ചാത്തന്നൂര്‍ ബി.എസ്.എന്‍.എല്‍ കോമ്പൗണ്ടില്‍ കയറി ഉപഭോക്തൃ സേവനകേന്ദ്രത്തോട് ചേര്‍ന്നുള്ള എസ്.ഡി.ഒ.ടി (പി) ഓഫിസിലെ കതകിന്‍റെ പൂട്ടുപൊളിച്ച്‌ മോഷ്ടാക്കള്‍ അകത്തു കടക്കുകയും അലമാര കുത്തിത്തുറക്കുകയും ചെയ്തു. ഉപകരണങ്ങളോ പണമോ നഷ്ടപ്പെട്ടിട്ടില്ലന്ന് ബി.എസ്.എന്‍.എല്‍ അധികൃതര്‍ പറഞ്ഞു. ബി.എസ്.എന്‍.എല്‍ അധികൃതര്‍ പോലീസില്‍ പരാതി നല്‍കി. ചാത്തന്നൂര്‍ പോലീസും കൊല്ലത്തുനിന്നുള്ള ഡോഗ് സ്ക്വാഡും സംഭവസ്ഥലത്തെത്തി. ചാത്തന്നൂര്‍ പോലീസ് മേല്‍നടപടികള്‍ സ്വീകരിച്ചു.
