കൈപ്പട്ടൂർ : ഗവൺമെന്റ് വി.എച്ച്.എസ്.എസ്. കൈപ്പട്ടൂരിലെ നാഷണൽ സർവീസ് സ്കീം യൂണിറ്റിന്റെ നേതൃത്വത്തിൽ സ്കൂൾ പരിസരത്ത് ചെണ്ടുമല്ലി തൈകൾ നട്ടുപിടിപ്പിച്ചു. സ്കൂൾ ക്യാമ്പസ് ഹരിതാഭമാക്കുക, പൂന്തോട്ട വികസനം പ്രോത്സാഹിപ്പിക്കുക എന്നിവ ലക്ഷ്യമിട്ടാണ് പരിപാടി സംഘടിപ്പിച്ചത്. പ്രിൻസിപ്പൽ സജിത ബീവി ചെണ്ടുമല്ലി തൈകൾ കൈമാറി പരിപാടിക്ക് തുടക്കം കുറിച്ചു. അധ്യാപകരും എൻ.എസ്.എസ്. വളണ്ടിയർമാരും ചേർന്ന് തൈകൾ നട്ടുപിടിപ്പിച്ചു.
വിദ്യാർത്ഥികളുടെ സജീവ പങ്കാളിത്തം പരിപാടിയെ ശ്രദ്ധേയമാക്കി. സ്കൂൾ പരിസരത്ത് പ്രത്യേകം തയ്യാറാക്കിയ പുഷ്പത്തോട്ടത്തിലാണ് തൈകൾ നട്ടത്. പരിസ്ഥിതി സംരക്ഷണത്തിന്റെയും പ്രകൃതി സൗഹൃദ പ്രവർത്തനങ്ങളുടെയും പ്രാധാന്യം വിദ്യാർത്ഥികളിൽ വളർത്താൻ ഇത്തരം പ്രവർത്തനങ്ങൾ സഹായകമാകുമെന്ന് അധ്യാപകർ അഭിപ്രായപ്പെട്ടു. എൻ.എസ്.എസ്. പ്രോഗ്രാം ഓഫീസർ ഷാജി പി.യുടെ നേതൃത്വത്തിലാണ് പരിപാടി സംഘടിപ്പിച്ചത്.
