ചെന്നീർക്കര : പുതിയ പൈപ്പ് സ്ഥാപിക്കാൻ ചെന്നീർക്കര മുറിപ്പാറമൺ- ഊന്നുകൽ റോഡിൽ കൈത്തോട് കലുങ്കിന് സമീപം ജല അതോറിറ്റി എടുത്ത കുഴി നികത്താത്തത് വാഹനയാത്രക്കാർക്ക് അപകടഭീഷണി ഉയർത്തുന്നു. മൂന്ന് മാസം മുൻപാണ് ഇവിടെ കുഴി എടുത്തത്. കഴിഞ്ഞ ദിവസം കുഴിയിൽവീണ് ഇരുചക്രവാഹനയാത്രക്കാരന് പരിക്കേറ്റിരുന്നു.
കുഴി എടുത്ത ഭാഗത്ത് ബി.എസ്.എൻ.എൽ. സ്ഥാപിച്ച കേബിൾ മുറിഞ്ഞതിനാൽ പായിക്കാട്ട് ഭാഗത്തെ ലാൻഡ് ഫോൺ ബന്ധം വിച്ഛേദിക്കപ്പെട്ടതായും പരാതി ഉയർന്നിട്ടുണ്ട്. കൂടാതെ കച്ചിറ എൽ.പി. സ്കൂളിന് സമീപം ചെന്നീർക്കര പഞ്ചായത്ത് സ്ഥാപിച്ച ഇന്റര് ലോക്ക് കട്ടകള് ഇളകിമാറിയിട്ടുണ്ട്. കുഴി നികത്താനുള്ള നടപടികൾ ഉടൻ സ്വീകരിക്കണമെന്ന് നാട്ടുകാര് ആവശ്യപ്പെടുന്നു.
