ആലപ്പുഴ: ശബരിമല വിഷയത്തിലെ കബളിപ്പിക്കല് മുഖ്യമന്ത്രി പിണറായി വിജയന് നിര്ത്തികൂടെയെന്ന് പ്രതിപക്ഷ നേതാവ് രമേശ് ചെന്നിത്തല. യുവതീ പ്രവേശന വിഷയത്തില് ദേവസ്വം മന്ത്രി കടകംപള്ളി സുരേന്ദ്രന് മാപ്പ് ചോദിക്കുന്നു. മുഖ്യമന്ത്രി മൗനം പാലിക്കുന്നു. പാര്ട്ടി സെക്രട്ടറി സീതാറാം യെച്ചൂരി നിലപാടില് ഉറച്ചു നില്ക്കുന്നു. വിശ്വാസികളെ മുഖ്യമന്ത്രി കബളിപ്പിക്കുകയാണെന്നും ചെന്നിത്തല കുറ്റപ്പെടുത്തി.
പിണറായിക്ക് അന്തസുണ്ടെങ്കില് ശബരിമല വിഷയത്തില് തെറ്റുപറ്റിയെന്ന് പറഞ്ഞ് മാപ്പു ചോദിക്കണം. നാട്ടിലെ ജനങ്ങളോട് സത്യം പറയണം. വനിതാ മതില് കെട്ടിയത് തെറ്റായിപ്പോയെന്ന് പറയണം. നവോത്ഥാന നായകന്റെ കപടവേഷം മുഖ്യമന്ത്രി അഴിച്ചുവെക്കണമെന്നും ചെന്നിത്തല ആവശ്യപ്പെട്ടു. വിശ്വാസ സമൂഹത്തെ വഞ്ചിച്ച സര്ക്കാറിനെ മുന്നോട്ടു പോകാന് കേരളത്തിലെ ജനങ്ങള് അനുവദിക്കില്ലെന്നും ശബരിമല വിഷയം ജനങ്ങളുടെ മുമ്പിലുണ്ടെന്നും ചെന്നിത്തല ചൂണ്ടിക്കാട്ടി.
സി.പി.എമ്മും ബി.ജെ.പിയും തമ്മിലുള്ള ബന്ധം അവരുടെ സ്ഥാനാര്ഥി നിര്ണയത്തില് തന്നെ വ്യക്തമാണ്. മുഖ്യമന്ത്രി എത്ര ന്യായീകരിക്കാന് ശ്രമിച്ചാലും ബാലശങ്കറിന്റെ വെളിപ്പെടുത്തല് നിലനില്ക്കുകയാണ്. സി.പി.എം- ബി.ജെ.പി ബന്ധം മറനീക്കി പുറത്തുവന്നിരിക്കുന്നു.
കോണ്ഗ്രസ് ആണ് നേമത്ത് ബി.ജെ.പിയെ നേരിടാന് കെ. മുരളീധരനെ നിര്ത്തിയിട്ടുള്ളത്. പുലിമടയില് പോയി പുലിയെ നേരിടാന് കോണ്ഗ്രസിനും യു.ഡി.എഫിനും മാത്രമേ കഴിയൂവെന്നും ചെന്നിത്തല പറഞ്ഞു.
