തൊടുപുഴ : കനത്ത മഴയെ തുടര്ന്ന് ജലനിരപ്പ് പരമാവധി സംഭരണ ശേഷിയോട് അടുത്തതോടെ ഇടുക്കി ചെറുതോണി ഡാം തുറന്നു.ഒരു ഷട്ടര് 70 സെന്റീമീറ്ററാണ് ഉയര്ത്തിയത്. 50 ഘനയടി വെള്ളമാണ് പെരിയാറിലേക്ക് ഒഴുക്കുക. നിലവില് 2384.14 അടിയാണ് ജലനിരപ്പ്. 2403 അടിയാണ് ഡാമിന്റെ സംഭരണ ശേഷി. ജലനിരപ്പ് റൂള് കര്വ് പ്രകാരം അനുവദനീയ സംഭരണശേഷി പിന്നിട്ടതോടെ ഇടുക്കി ഡാം തുറന്നു.
ചെറുതോണി ഡാമിന്റെ ഒരു ഷട്ടറാണ് നേരത്തെ അറിയിച്ചിരുന്നതുപോലെ രാവിലെ 10 മണിയോടെ തുറന്നത്. ഈ ഷട്ടര് 70 സെന്റിമീറ്റര് ഉയര്ത്തി 50 ക്യുമെക്സ് (50,000 ലീറ്റര്) വെള്ളമാണ് പെരിയാറിലേക്ക് ഒഴുക്കുന്നത്.നിലവില് 2384.10 അടിയാണ് അണക്കെട്ടിലെ ജലനിരപ്പ്. 2383.53 ആണ് റൂള് കര്വ്. ഇടുക്കി ഡാമില് ഇന്നലെ റെഡ് അലര്ട്ട് പ്രഖ്യാപിച്ചിരുന്നു. ഡാം തുറന്നെങ്കിലും ആശങ്ക വേണ്ടെന്ന് മന്ത്രി റോഷി അഗസ്റ്റിന് വ്യക്തമാക്കി.
പെരിയാറിന്റെ കരയിലുള്ളവരും ആശങ്കപ്പെടേണ്ടതില്ലെന്ന് മന്ത്രി അറിയിച്ചു.ഡാം തുറക്കുന്നതിന്റെ ഭാഗമായി പെരിയാര് തീരത്തുള്ള 79 കുടുംബങ്ങള്ക്ക് നോട്ടീസ് നല്കുകയും 26 ക്യാമ്ബുകള് തുറക്കുകയും ചെയ്തിട്ടുണ്ട്. ജനവാസ മേഖലയിലേക്ക് വെള്ളം കയറില്ലെങ്കിലും 5 വില്ലേജുകളിലും ആറ് പഞ്ചായത്തുകളിലും അതിജാഗ്രതാ നിര്ദേശം നല്കിയിട്ടുണ്ട്.
500 ക്യൂബിക് മീറ്റര് പെര് സെക്കന്റ് ജലം വരെ തുറന്ന് വിട്ടാല് പെരിയാറില് കാര്യമായി വ്യത്യാസമുണ്ടാവാനിടയില്ലെന്നാണ് വിലയിരുത്തല്. എന്നാല് നിലവിലെ സാഹചര്യത്തില് അത്രയും ജലം തുറന്ന് വിടേണ്ടതുമില്ല.2021 ഇല് 100 ക്യൂമെക്സ് ജലമാണ് ഇടുക്കി ഡാമില് നിന്ന് തുറന്നു വിട്ടത്. ലോവര് പെരിയാറിന്റെ വൃഷ്ടി പ്രദേശങ്ങളില് സംഭരിക്കുകയും വൈദ്യുതി ഉത്പാദിപ്പിക്കുകയും ചെയ്ത ശേഷം 40 ക്യൂമെക്സ് ജലം മാത്രമാണ് അന്ന് താഴേക്ക് ഒഴുകിയെത്തിയത്. ഇടമലയാര് ഡാമില് ഓറഞ്ച് അലേര്ട്ടാണ് നിലവില്.
