തിരുവനന്തപുരം: സ്കൂളുകളുടെ പരസ്യ ബോര്ഡുകളില് നിന്ന് കുട്ടികളെ ഒഴിവാക്കണമെന്ന് ബാലാവകാശ കമ്മീഷന്. കുട്ടികളുടെ ഫോട്ടോ വെച്ച് സ്കൂളുകള് പ്രദര്ശിപ്പിക്കുന്ന ഫ്ലക്സുകളും പരസ്യങ്ങളും ഒഴിവാക്കണമെന്നും നിര്ദേശിച്ചു. വിദ്യാര്ത്ഥികളില് അനാവശ്യ മത്സരബുദ്ധിയും സമ്മര്ദവും സൃഷ്ടിക്കുന്നതാണ് ഇത്തരം പ്രവണതകളെന്നും കമ്മീഷന് നിരീക്ഷിച്ചു. ഇതിനാവശ്യമായ ഉത്തരവുകള് പുറപ്പെടുവിക്കാന് പൊതുവിദ്യാഭ്യാസ വകുപ്പ് പ്രിന്സിപ്പല് സെക്രട്ടറി, ഡയറക്ടര്, പരീക്ഷാ സെക്രട്ടറി എന്നിവര്ക്ക് കമ്മീഷന് നിര്ദേശം നല്കി.
കുട്ടികളുടെ വേനലവധി നഷ്ടപ്പെടുത്തി എല്.എസ്.എസ്, യു.എസ്.എസ് പരീക്ഷകള്ക്കായി സ്കൂളുകള് പ്രത്യേക ക്ലാസ് ഏര്പ്പെടുത്തുന്നത് നിരോധിക്കണം. പരീക്ഷകള്ക്കായുള്ള സ്വകാര്യ ട്യൂഷന് സെന്ററുകളിലെ പ്രത്യേക പരിശീലനം നിര്ത്തലാക്കണം. കുട്ടികളെ സ്കൂളുകളില് വേര്തിരിച്ചിരുത്തി ക്ലാസ് നടത്തുന്നതും അവധി ദിവസങ്ങളിലടക്കം പ്രത്യേക പരിശീലനം നല്കുന്നതും തടയണമെന്നത് ഉള്പ്പെടെയുള്ള നിര്ദേശങ്ങളും ബാലാവകാശ കമ്മീഷന് മുന്നോട്ട് വെക്കുന്നു.
