ന്യൂഡല്ഹി : ബയോമെട്രിക് വിവരങ്ങള് അപ്ഡേറ്റ് ചെയ്യാന് വൈകിയാലും കുട്ടികളുടെ ആധാര് റദ്ദാകില്ല. ഇതിനായി 2016 ലെ ചട്ടം കേന്ദ്ര ഐടി മന്ത്രാലയം ഭേദഗതി ചെയ്തു. ആധാര് നല്കുമെങ്കിലും 5 വയസ്സില് താഴെയുള്ള കുട്ടികളുടെ വിരലടയാളം അടക്കമുള്ള ബയോമെട്രിക് വിവരങ്ങള് ശേഖരിക്കാറില്ല. ചെറുപ്രായത്തില് വിരലടയാളവും മറ്റും പൂര്ണമായും വികസിക്കാത്തതു മൂലമാണിത്. എന്നാല് 5 വയസ്സു തികഞ്ഞ് 2 വര്ഷത്തിനുള്ളില് ആദ്യ ബയോമെട്രിക് അപ്ഡേഷന് നടത്തണമെന്നാണ് വ്യവസ്ഥ. ഇതു ചെയ്തില്ലെങ്കില് ആധാര് നിര്ജീവമാകും.
പിന്നെയും ഒരു വര്ഷത്തിനുള്ളില് അപ്ഡേറ്റ് ചെയ്തില്ലെങ്കില് ആധാര് നമ്പര് തന്നെ റദ്ദാക്കുമായിരുന്നു. ഈ വ്യവസ്ഥയാണ് നീക്കിയത്. റദ്ദാകില്ലെങ്കിലും ആധാര് നിര്ജ്ജീവ അവസ്ഥയിലായിരിക്കും. 15-ാം വയസ്സില് കുട്ടിയുടെ രണ്ടാം ബയോമെട്രിക് അപ്ഡേഷന് നടത്തണം. അപ്പോഴും ഇതേ ചട്ടം ബാധകമായിരിക്കും. 5, 15 വയസ്സ് കഴിഞ്ഞ് 2 വര്ഷത്തിനുള്ളില് ബയോമെട്രിക് അപ്ഡേറ്റ് ചെയ്യുന്നത് സൗജന്യമായിരിക്കും. ഡീആക്ടിവേറ്റ് ചെയ്യപ്പെട്ട ആധാര് പുനഃസ്ഥാപിക്കാനുള്ള ഫീല്ഡ് പരിശോധനയില് നിന്ന് കുട്ടികളെ ഒഴിവാക്കി.
