ബെയ്ജിങ് : ചൈനയിലെ ആയോധന പരിശീലന കേന്ദ്രത്തിലുണ്ടായ അഗ്നിബാധയില് 18 പേര് മരിച്ചു. പ്രദേശത്ത് താമസിക്കുന്ന കുട്ടികളാണ് മരിച്ചവരില് ഭൂരിഭാഗവും. വ്യാഴാഴ്ച മൂന്നുമണിയോടെയായിരുന്നു തീപിടുത്തം. ഇതിന്റെ കാരണം ഇതുവരെ വ്യക്തമല്ല. 16 പേര്ക്ക് പരിക്കേറ്റതായും നാലുപേരുടെ നില അതീവ ഗുരുതരമാണെന്നും ഷേചെങ് കൗണ്ടി സര്ക്കാര് അറിയിച്ചു.
സംഭവത്തില് പരിശീലന കേന്ദ്രത്തിന്റെ ഉടമയെ പോലീസ് കസ്റ്റഡിയിലെടുത്തു. ഏഴിനും 16നും ഇടയില് പ്രായമുള്ള കുഞ്ഞുങ്ങളാണ് മരിച്ചവരില് കൂടുതലും. രണ്ടാം നിലയിലാണ് ആയോധന കല പരിശീലന കേന്ദ്രം. അവിടെ തീ പടര്ന്നതോടെ കുട്ടികള് രക്ഷപെടാന് ഏറെ ബുദ്ധിമുട്ടിയെന്നാണ് വിവരം. മരിച്ചവരെ തിരിച്ചറിഞ്ഞിട്ടില്ല. ഷേചെങ് മാര്ഷ്യല് ആര്ട്സ് സെന്ററിലാണ് തീപിടുത്തമുണ്ടായതെന്നാണ് വിവരം. കെട്ടിടങ്ങളിലെ നിര്മ്മാണ രീതിയെ തുടര്ന്ന് തീപിടിത്തം ചൈനയില് സാധാരണമാണ് . 2000 ത്തില് ക്രിസ്മസ് തലേദിവസം ഹെനാനിലുണ്ടായ അഗ്നിബാധയില് 309 പേര്ക്കാണ് ജീവന് നഷ്ടപ്പെട്ടത് .
