ന്യൂഡല്‍ഹി : അധോലോക കുറ്റവാളി ഛോട്ടാ രാജനെന്ന രാജേന്ദ്ര നികാല്‍ജെക്ക് കോവിഡ് സ്ഥിരീകരിച്ചു. തിഹാര്‍ ജയില്‍ കഴിഞ്ഞിരുന്ന ഛോട്ടാ രാജന് രോഗം സ്ഥിരീകരിച്ചതിനെ തുടര്‍ന്ന് ഡല്‍ഹിയിലെ എയിംസില്‍ പ്രവേശിപ്പിച്ചതായി ജയില്‍ അധികൃതര്‍ അറിയിച്ചു.
61കാരനായ ഛോട്ടാ രാജനെ കനത്ത സുരക്ഷ വലയത്തിലാണ് തിഹാര്‍ ജയിലില്‍ പാര്‍പ്പിച്ചിരുന്നത്. ഇന്തോനേഷ്യയിലെ ബാലിയില്‍നിന്ന് 2015ല്‍ അറസ്റ്റിലായ ഛോട്ടാ രാജനെ തിഹാര്‍ ജയിലിലേക്ക് കൊണ്ടുവരികയായിരുന്നു. ഛോട്ടാ രാജനെതിരായ എല്ലാ കേസുകളും സി.ബി.ഐക്ക് കൈമാറുകയും പ്രത്യേക കോടതി രൂപീകരിക്കുകയും ചെയ്തിരുന്നു.
തിങ്കളാഴ്ച തിഹാര്‍ ജയിലിലെ അസിസ്റ്റന്റ് ജയിലര്‍, ഛോട്ടാ രാജന് കോവിഡ് സ്ഥിരീകരിച്ച വിവരം ഫോണിലൂടെ സെഷന്‍സ് കോടതിയെ അറിയിക്കുകയായിരുന്നു. രോഗം സ്ഥിരീകരിച്ചതിനാല്‍ വിഡിയോ കോണ്‍ഫറന്‍സ് വഴി കോടതിയില്‍ ഹാജരാക്കാന്‍ കഴിയില്ലെന്നും അദ്ദേഹം അറിയിച്ചു. മുംബൈയിലെ നിരവധി കൊലപാതക കേസുകള്‍ ഉള്‍പ്പെടെ 70ഒാളം ക്രിമിനല്‍ കേസുകളില്‍ പ്രതിയാണ് ഛോട്ടാ രാജന്.
