ആറന്മുള : പള്ളിയോട നിര്മ്മാണം, വികസനം, പ്രചാരണം, നേതൃത്വം തുടങ്ങിയ വിവിധ മേഖലകളില് പ്രവര്ത്തിച്ചവരെ പള്ളിയോട സേവാസംഘം ആദരിച്ചു. പള്ളിയോട സേവാസംഘത്തിന്റെ വികസന കാലഘട്ടത്തില് ദീര്ഘകാലം നേതൃത്വം നല്കിയ സേവാസംഘം മുന് പ്രസിഡന്റ് ഡോ. കെ.ജി. ശശിധരന് പിള്ളയെ ആദരിച്ചു. ഉതൃട്ടാതി ജലമേള വേദിയില് ആരോഗ്യമന്ത്രി വീണ ജോര്ജ് പള്ളിയോട സേവാസംഘം ഉപഹാരം സമ്മാനിച്ചു. 18 വര്ഷത്തോളം ശശിധരന് പിള്ള പള്ളിയോട സേവാ സംഘം പ്രസിഡന്റായിരുന്ന കാലഘട്ടത്തിലാണ് പാഞ്ചജന്യം ഓഡിറ്റോറിയം, ഓഫീസ്, മ്യൂസിയം നിര്മ്മാണം തുടങ്ങിയവ നടന്നത്. വള്ളസദ്യ നിരീക്ഷണസമതി അംഗമായും ജില്ലാ ക്യാന്സര് സെന്റര് ഡയറക്ടര് കൂടിയായ ശശിധരന്പിള്ള പ്രവര്ത്തിച്ചിട്ടുണ്ട്.
പള്ളിയോട ശില്പികളായ അയിരൂര് ചെല്ലപ്പന് ആശാരി, ചങ്ങങ്കരി വേണു ആശാരി എന്നിവരെയും സാംസ്കാരിക മന്ത്രി സജി ചെറിയാന് ആദരിച്ചു. 25 പുതിയ ചുണ്ടന് വള്ളങ്ങളുടെ നിര്മ്മാണം ഇവരുടെ നേതൃത്വത്തില് ആറന്മുളയില് നടന്നിട്ടുണ്ട്. 60 വയസ് കഴിഞ്ഞ പള്ളിയോട ശില്പികള്ക്ക് സാംസ്കാരിക വകുപ്പില്നിന്ന് പെന്ഷന് അനുവദിക്കാനുള്ള നടപടി പൂര്ത്തിയാകുന്നതായി മന്ത്രി അറിയിച്ചു. വഞ്ചിപ്പാട്ട് രചനയിലും പ്രചാരണത്തിലും ശ്രദ്ധ കേന്ദ്രീകരിച്ച ആചാര്യന് പ്രഫ. രാധാകൃഷ്ണപിള്ള ഇടനാടിനെ ആന്റോ ആന്റണി എം.പി. ആദരിച്ചു. വ്യക്തിത്വം. വഞ്ചിപ്പാട്ടുമായി ബന്ധപ്പെട്ട് ധാരാളം പുസ്തകങ്ങളും ഓഡിയോ കാസറ്റ്, സിഡി എന്നിവയും അദ്ദേഹത്തിന്റെ സംഭാവനയില് ഉള്പ്പെടുന്നു. ടോപ് സിംഗര് വിജയി ആറന്മുള സ്വദേശി ദേവനന്ദ രാജീവിനെ ഉപഹാരം നല്കി പള്ളിയോടസേവാസംഘം പ്രസിഡന്റ് കെ.വി. സാംബദേവന് ആദരിച്ചു. സെക്രട്ടറി പ്രസാദ് ആനന്ദഭവന്, ട്രഷറര് രമേഷ് മാലിമേല് വൈസ് പ്രസിഡന്റ് സുരേഷ് കുമാര് ജോ. സെക്രട്ടറി അജയ് ഗോപിനാഥ് എന്നിവര് പ്രസംഗിച്ചു.
