മുംബൈ ; മഹാരാഷ്ട്രയില്‍ ഇനി സിഗരറ്റോ ബീഡിയോ മറ്റു പുകയില ഉല്പന്നങ്ങളോ ചില്ലറയായി വില്‍ക്കാന്‍ കഴിയില്ല. സിഗരറ്റ്, ബീഡി തുടങ്ങി പുകയിലഉല്‍പ്പന്നങ്ങളുടെ ചില്ലറ വില്‍പ്പന നിരോധിച്ച രാജ്യത്തെ ആദ്യത്തെ സംസ്ഥാനമായി മാറിയിരിക്കുകയാണ് മഹാരാഷ്ട്ര. സിഗരറ്റ് വില്‍പ്പന നിരോധിച്ച രാജ്യത്തെ സംസ്ഥാനങ്ങളുടെ പട്ടികയില്‍ ഒന്നാംസ്ഥാനത്താണ് ഇപ്പോള്‍ മഹാരാഷ്ട്ര. സംസ്ഥാന പൊതുജനാരോഗ്യ വകുപ്പ് വ്യാഴാഴ്ച പുറത്തിറക്കിയ വിജ്ഞാപനത്തിലാണ് സിഗരറ്റ്, ബീഡി എന്നിവയുടെ ചില്ലറവില്‍പ്പന നിരോധിച്ചുകൊണ്ടുള്ള ഉത്തരവ് പ്രസിദ്ധീകരിച്ചത്.
7-ാം വകുപ്പിലെ ഭാഗം (2) ലാണ് സിഗരറ്റിന്റെയും മറ്റ് പുകയില ഉല്‍പന്നങ്ങളുടെയും വാണിജ്യ, വാണിജ്യേതര ഉല്‍പാദനം, വിതരണം, എന്നിവയുടെ നിരോധനം ഉള്‍പ്പെടുത്തിയിരിക്കുന്നത്. ആരോഗ്യ വിഭാഗം പ്രിന്‍സിപ്പല്‍ സെക്രട്ടറി ഡോ. പ്രദീപ് വ്യാസ് ആണ് വിജ്ഞാപനത്തില്‍ ഒപ്പിട്ടത്. പുകവലിയുടെ ദോഷത്തെക്കുറിച്ച്‌ പൊതുജനങ്ങളെ ബോധവത്കരിക്കുന്നതിനായി സര്‍ക്കാര്‍ സംഘടിപ്പിച്ച ബോധവത്ക്കരണ പരിപാടികളുടെ ഭാഗമായാണ് പുതിയ നിയമം.
