മല്ലപ്പള്ളി :ശമ്പളം വെള്ളത്തിലെ വര … ആശാപ്രവര്‍ത്തകര്‍ 5000 രൂപ പിരിച്ചു നല്‍കണമെന്ന് ബ്ലോക്ക് സെക്രട്ടറി. ശമ്പളമില്ലാതെ ആശാപ്രവര്‍ത്തകരില്‍ നിന്ന് നിര്‍ബന്ധിത പണപ്പിരിവുമായി സിഐടിയു. ആശ വര്‍ക്കര്‍മാരുടെ സി.ഐ.ടി.യു സംഘടനയുടെ ജില്ലാ, സംസ്ഥാന സമ്മേളനങ്ങള്‍ക്കായി പത്തനംതിട്ട ജില്ലയിലെ ആശാ പ്രവര്‍ത്തകര്‍ 5000 രൂപ വീതം നല്‍കണമെന്നാണ് നിര്‍ദ്ദേശം.
മെയ് മാസത്തില്‍ 2000 രൂപയും ബാക്കി 3000 രൂപ പിരിച്ചോ അല്ലാതെയോ നല്‍കണമെന്നാണ് നിര്‍ദ്ദേശം. അതേസമയം, ആശ വര്‍ക്കര്‍മാരുടെ രണ്ടു മാസത്തെ ഓണറേറിയം ഇപ്പോഴും കുടിശ്ശികയാണ്. സംഘടനയുടെ മല്ലപ്പള്ളി ബ്ലോക്ക് സെക്രട്ടറിയാണ് തീരുമാനം ആശ വര്‍ക്കന്മാരുടെ വാട്സാപ് ഗ്രൂപ്പില്‍ അറിയിച്ചത്. ‘പിരിച്ചെടുക്കുന്ന തുക മല്ലപ്പള്ളി പാര്‍ട്ടി ഓഫിസില്‍ അടയ്ക്കണം. പത്തനംതിട്ട കോട്ടാങ്ങല്‍ പഞ്ചായത്തിലെ ആദ്യ ഗഡുവായി 1000 രൂപ വീതം പിരിച്ചു. മറ്റുള്ളവര്‍ക്ക് എന്താണ് ഇത്ര ബുദ്ധിമുട്ട്’ എന്നും ഓഡിയോയില്‍ ചോദിക്കുന്നുണ്ട്.
