തിരുവനന്തപുരം : അഖിലേന്ത്യാ സിവില് സര്വീസ് ഡെപ്യൂട്ടേഷന് നിയമനത്തില് കേന്ദ്ര സര്ക്കാര് കൊണ്ടുവന്ന ഭേദഗതിയെ എതിര്ത്ത് കേരളം. കേന്ദ്രനീക്കത്തിലെ അതൃപ്തി അറിയിച്ച് മുഖ്യമന്ത്രി പിണറായി വിജയന് പ്രധാനമന്ത്രി നരേന്ദ്രമോദിക്ക് കത്തെഴുതി. കേന്ദ്രം നിര്ദേശിക്കുന്ന ഭേദഗതി നിലവിലെ ഫെഡറല് സംവിധാനത്തെ ദുര്ബലപ്പെടുത്തുമെന്നും ഭേദഗതി സിവില് സര്വീസ് ഉദ്യോഗസ്ഥരില് ആശങ്കയും ഭീതിയും ജനിപ്പിക്കുമെന്നും കത്തില് പറയുന്നു. അതിനാല് ഭേദഗതി നീക്കം ഉപേക്ഷിക്കണമെന്ന് പിണറായി വിജയന് പ്രധാനമന്ത്രിക്ക് അയച്ച കത്തില് ആവശ്യപ്പെട്ടു.
സംസ്ഥാനങ്ങളുടെ അനുമതി ഇല്ലാതെ ഐഎഎസ്, ഐപിഎസ് ഉദ്യോഗസ്ഥരെ സ്ഥലം മാറ്റുന്നതിനും എപ്പോള് വേണമെങ്കിലും കേന്ദ്ര ഡെപ്യൂട്ടേഷനിലേക്ക് മാറ്റുന്നതിനും കേന്ദ്രത്തിന് അധികാരം നല്കുന്ന ഭേദഗതിയാണ് കൊണ്ടുവരുന്നത്. സര്വീസ് ചട്ടങ്ങളിലെ ഭേഗദതിയെ സംബന്ധിച്ച് എല്ലാ സംസ്ഥാനങ്ങളും ചൊവ്വാഴ്ചക്ക് മുന്പ് അഭിപ്രായം അറിയിക്കണമെന്നാണ് കേന്ദ്ര പേഴ്സണല് മന്ത്രാലയം നല്കിയിട്ടുള്ള നിര്ദേശം. എന്നാല് കേന്ദ്ര നിര്ദേശത്തിന് എതിരെ പ്രതിപക്ഷ പാര്ട്ടികള് ഭരിക്കുന്ന സംസ്ഥാനങ്ങള് രംഗത്ത് വരികയായിരുനിന്നു.
