തിരുവനന്തപുരം: നിയമസഭാ തെരഞ്ഞെടുപ്പ് കാലത്ത് പാർട്ടിക്കും പിണറായി വിജയനുമെതിരെ ഉയർത്തിയ ഡീൽ ആരോപണത്തിൽ കോൺഗ്രസ് നേതൃത്വം നിലപാട് വ്യക്തമാക്കണമെന്ന് സിപിഐഎം. നാളെ ഇൻഡ്യാ സഖ്യം യോഗം ചേരാനിരിക്കെ എഐസിസി അധ്യക്ഷൻ മല്ലികാർജുൻ ഖാർഗെയ്ക്ക് അയച്ച കത്തിലാണ് സിപിഐഎം ജനറൽ സെക്രട്ടറി എം.എ. ബേബി കടുത്ത വിയോജിപ്പ് അറിയിച്ചത്. കേരളത്തിൽ സിപിഐഎമ്മും ബിജെപിയും തമ്മിൽ ഡീൽ ആണെന്നും പിണറായി വിജയനും നരേന്ദ്ര മോദിയും തമ്മിൽ ധാരണ ഉണ്ടാക്കിയെന്നും കോൺഗ്രസ് ആരോപണം ഉന്നയിച്ചിരുന്നു. രാഹുൽ ഗാന്ധി തുടർച്ചയായി പിണറായിക്കെതിരെ ഇ.ഡി നടപടിയും ആവശ്യപ്പെട്ടിരുന്നു.
2023ൽ ഇൻഡ്യാ സഖ്യം രൂപീകരിച്ചത് മുതൽ അതിന്റെ വിജയത്തിനായി പ്രവർത്തിക്കുകയാണ് സിപിഐഎമ്മെന്നും കോൺഗ്രസ് നിലപാട് പ്രതിപക്ഷ കൂട്ടായ്മയെ ദുർബലപ്പെടുത്തുന്നതാണെന്നും കത്തിലുണ്ട്. ഇൻഡ്യാ സഖ്യത്തിലെ മറ്റ് കക്ഷികൾക്കും കത്തിന്റെ പകർപ്പ് കൈമാറി.
