തിരുവനന്തപുരം : സംസ്ഥാനത്ത് കൊലപാതക – അക്രമ സംഭവങ്ങള് വര്ധിച്ചു വരുന്നതായുള്ള ആരോപണം വസ്തുതാ വിരുദ്ധമാണെന്ന് മുഖ്യമന്ത്രി പിണറായി വിജയന്. നിയമസഭയില് അടിയന്തര പ്രമേയത്തിന് മറുപടി നല്കുകയായിരുന്നു അദ്ദേഹം. ഈ സര്ക്കാര് അധികാരത്തില് വന്ന ശേഷം 6 രാഷ്ട്രീയ കൊലപാതകങ്ങളാണ് നടന്നതെന്നും 92 പ്രതികളില് 72 പേരെ അറസ്റ്റ് ചെയ്തുവെന്നും മുഖ്യമന്ത്രി അറിയിച്ചു .യുഡിഎഫ് കാലത്ത് 35 രാഷ്ട്രീയ കൊലപാതകങ്ങളാണ് നടന്നതെന്നും മുഖ്യമന്ത്രി സഭയെ അറിയിച്ചു.
കിഴക്കമ്പലത്തെ ദീപുവിന്റെ മരണത്തില് പ്രതികളെ പിടികൂടി റിമാന്റ് ചെയ്തു.സംഭവത്തില് അന്വേഷണം നടന്നു വരികയാണ്. കണ്ണൂര് ഹരിദാസിന്റെ കൊലപാതകത്തില് 4 പ്രതികളെ അറസ്റ്റ് ചെയ്തു. കോട്ടയം ഈസ്റ്റ് ഷാന്ബാബു കൊലക്കേസില് ഒന്നും രണ്ടും പ്രതിക്കെതിരെ കാപ്പ ചുമത്തി. ഗുണ്ടാ ആക്രമണം തടയാന് ആവശ്യമായ നടപടി പോലീസ് മേധാവിയുടെ നേതൃത്വത്തില് സ്വീകരിച്ചു. ഗുണ്ടകളെയും സാമൂഹ്യ വിരുദ്ധരെയും പിടികൂടാന് ഓപ്പറേഷന് കാവല് നടപ്പാക്കി വരുന്നുണ്ട്. ഓപ്പറേഷന് കാവല് പദ്ധതി പ്രകാരം 904 പേര്ക്കെതിരേ ക്രിമിനല് നടപടി സ്വീകരിച്ചു. 64 പേര്ക്കെതിരെ കാപ്പ ചുമത്തി. 1457 പേരെ അറസ്റ്റ് ചെയ്തു. കേരളത്തില് ക്രമസമാധാന തകര്ച്ചയില്ലെന്നും മുഖ്യമന്ത്രി പിണറായി വിജയന് അറിയിച്ചു.
