അടിമാലി : സീറ്റിനു പിന്നില് മൂര്ഖന് പാമ്പിനെ കണ്ടതിനെ തുടര്ന്ന് ബൈക്ക് യാത്രികന് അപകടത്തില്പ്പെടാതെ രക്ഷപെട്ടത് തലനാരിഴയ്ക്ക്. വാളറ സ്വദേശി അജയ് വീട്ടില്നിന്നും നേര്യമംഗലത്തെ ജോലിസ്ഥലത്തേക്ക് പോകുംവഴി ചീയപ്പാറ വെള്ളച്ചാട്ടത്തിന് സമീപമെത്തിയപ്പോഴാണ് ടയര് പഞ്ചറായത് പോലെ ശബ്ദം കേട്ടത്. ഉടന് ബൈക്ക് നിര്ത്തി നോക്കിയപ്പോള് കണ്ടത് സീറ്റിന് പിന്നിലായി ചീറ്റികൊണ്ട് ഉയര്ന്നുനില്ക്കുന്ന മൂര്ഖന് പാമ്പിനെ. മൂന്നര കിലോമീറ്റര് യാത്രചെയ്തപ്പോഴാണ് പാമ്പ് തലപൊക്കിയത്.
ചാടിയിറങ്ങിയതിനാല് കടികൊള്ളാതെ രക്ഷപെട്ടു. അടുത്തുകിടന്ന കമ്പുകൊണ്ടു തട്ടി പാമ്പിനെ കാട്ടിലേക്ക് ഓടിച്ചു. പാമ്പിനെ ഓടിച്ചെങ്കിലും പേടിച്ച അജയ് ബൈക്ക് കഴുകിയ ശേഷമാണ് യാത്ര തുടര്ന്നത്. മഴക്കാലത്ത് വീട്ടിലും മറ്റും ഇട്ടിരിക്കുന്ന വാഹനങ്ങളിലും ഊരി ഇട്ടിരിക്കുന്ന ചെരുപ്പുകളിലും ഇഴജന്തുക്കള് കയറിക്കൂടാനുള്ള സാധ്യത ഏറെയാണ്.
