അരൂര്: ചന്തിരൂരില് കോള്ഡ് സ്റ്റോറേജിലെ റാക്കുകള് തകര്ന്നുവീണു ലക്ഷങ്ങളുടെ നാശനഷ്ടം . ആളപായമില്ല. ദേശീയ പാതയില് ചന്തിരൂര് ഹൈസ്കൂളിന് തെക്കുഭാഗത്ത് സ്നോബി എന്ന കോള്ഡ്സ്റ്റോറേജിലെ റാക്കുകളാണ് ഇന്നലെ ഉച്ചയ്ക്ക് തകര്ന്നു വീണത്.റാക്കുകള് നിര്മ്മിച്ചിരിക്കുന്ന ഇരുമ്പ്തൂണുകള് വളഞ്ഞ് പുറത്തേക്ക് വീഴുകയായിരുന്നു. വന് ശബ്ദം കേട്ട് പുറത്തുണ്ടായിരുന്ന ജീവനക്കാര് ഓടിയെത്തിയപ്പോഴാണ് സ്റ്റോറിന്റെ മുന്ഭാഗം തകര്ന്നു വീഴുന്നത് കണ്ടത്. അപകടത്തെ തുടര്ന്ന് സ്ഥാപനത്തിനകത്തെ ശീതീകരണ സംവിധാനമാകെ തകരാറിലായി.
അരൂര് മേഖലയിലെ മത്സ്യ സംസ്കരണ കയറ്റുമതി സ്ഥാപനങ്ങളിലെ കോടിക്കണക്കിന് രൂപയുടെ മത്സ്യ വിഭവങ്ങള് കയറ്റുമതിയ്ക്ക് മുമ്പായി പാക്ക് ചെയ്ത് സൂക്ഷിക്കുന്നത് ഇത്തരം കോള്ഡ് സ്റ്റോറേജുകളിലാണ്. കോള്ഡ്സ്റ്റോറേജില് സൂക്ഷിച്ചിരുന്ന മത്സ്യ വിഭവങ്ങള് വന്തോതില് നശിച്ചതായാണ് പ്രാഥമിക നിഗമനം.കേടാകാത്തവ മറ്റു കോള്ഡ് സ്റ്റോറേജുകളിലേയ്ക്ക് അടിയന്തിരമായി മാറ്റി. നഷ്ടം കണക്കാക്കിയിട്ടില്ല. സംഭവമറിഞ്ഞയുടന് അരൂര് അഗ്നിശമന സേനയും പോലീസും രക്ഷാപ്രവര്ത്തനത്തിനെത്തി. റാക്കുകളുടെ ബലക്കുറവും അമിതഭാരവുമാണ് അപകടത്തിന് കാരണമെന്ന് പറയപ്പെടുന്നു. .
