കളക്ടര്‍ ഇടപെട്ടു : കൊല്ലന്‍പടിയിലെ ഓടയുടെ അപകടാവസ്ഥയ്ക്ക് പരിഹാരമായി

കോന്നി : പുനലൂര്‍ – മൂവാറ്റുപുഴ സംസ്ഥാന പാതയിലെ കൊല്ലന്‍പടി ജംഗ്ഷനില്‍ കാല്‍നട യാത്രക്കാര്‍ക്ക് അപകട ഭീഷണിയായി തുറന്നുകിടന്നിരുന്ന ഓടയ്ക്ക് സ്ലാബ് സ്ഥാപിച്ചു. ജില്ലാ കളക്ടര്‍ എ.നിസാമുദ്ദീന്‍റെ അടിയന്തിര ഇടപെടലിനെത്തുടര്‍ന്നാണ് പ്രദേശവാസികളുടെയും യാത്രക്കാരുടെയും ദീര്‍ഘകാലത്തെ ആവശ്യം പരിഹരിച്ചത്. സമീപത്തെ എല്‍.പി. സ്‌കൂളിലെ വിദ്യാര്‍ത്ഥികളടക്കം നൂറുകണക്കിനാളുകള്‍ ദിവസേന ആശ്രയിക്കുന്ന പാതയാണിത്. ഓട തുറന്നുകിടന്നത് കാല്‍നട യാത്രക്കാര്‍ക്ക് വലിയ സുരക്ഷാ ഭീഷണിയായിരുന്നു. ഓടയില്‍ വീണ് കുട്ടികളടക്കം നിരവധി പേര്‍ക്ക് മുന്‍പ് പരിക്കേറ്റിട്ടുണ്ട്.

അപകട സാധ്യത സംബന്ധിച്ച് മാധ്യമങ്ങളില്‍ വന്ന വാര്‍ത്തകള്‍ ശ്രദ്ധയില്‍പ്പെട്ട ജില്ലാ കളക്ടര്‍ വിഷയത്തില്‍ അടിയന്തിരമായി ഇടപെടുകയായിരുന്നു. വിദ്യാര്‍ത്ഥികളുടെയും പൊതുജനങ്ങളുടെയും സുരക്ഷ കണക്കിലെടുത്ത് ഓടയ്ക്ക് മുകളില്‍ ഉടന്‍ സ്ലാബ് സ്ഥാപിക്കുവാന്‍ പൊതുമരാമത്ത് വകുപ്പ് ഉദ്യോഗസ്ഥര്‍ക്ക് കളക്ടര്‍ നിര്‍ദേശം നല്‍കി. ഇതേത്തുടര്‍ന്ന് നിര്‍മ്മാണ പ്രവൃത്തികള്‍ വേഗത്തില്‍ പൂര്‍ത്തിയാക്കി സ്ലാബുകള്‍ സ്ഥാപിക്കുകയായിരുന്നു. വിദ്യാര്‍ത്ഥികളുടെയും കാല്‍നട യാത്രക്കാരുടെയും സുരക്ഷ ഉറപ്പാക്കുന്നതിനൊപ്പം പ്രദേശത്തെ ദീര്‍ഘകാലത്തെ പരാതിക്കും ഇതോടെ പരിഹാരമായി.