കോഴിക്കോട് : കാലിക്കറ്റ് സര്വകലാശാല ക്യാമ്പസിലെ ലൈംഗിക പീഡന ആരോപണത്തിന് വിധേയനായ അദ്ധ്യാപകന് ഡോ കെ ഹാരിസിനെ സര്വീസില് നിന്ന് പുറത്താക്കി. സര്വകലാശാലയിലെ ഇംഗ്ലീഷ് വിഭാഗം അസിസ്റ്റന്റ് പ്രൊഫസറായിരുന്ന ഹാരിസിനെതിരെ ലൈംഗികമായി ചൂഷണം ചെയ്തുവെന്ന് കാട്ടി വിദ്യാര്ത്ഥികള് പരാതിപ്പെട്ടിരുന്നു. ഈ പരാതിയുടെ അടിസ്ഥാനത്തിലാണ് ഹാരിസിനെ പുറത്താക്കിയത്. ഇന്നു ചേര്ന്ന സിന്ഡിക്കേറ്റ് യോഗത്തിലാണ് തീരുമാനമുണ്ടായത്.
2021 ജൂലായിലാണ് ഡോ കെ ഹാരിസിനെതിരെ ഗവേഷക വിദ്യാര്ത്ഥിനി ലൈംഗിക ചൂഷണം ആരോപിച്ച് പരാതി നല്കിയത്. ഈ പരാതി ആഭ്യന്തര പരാതി പരിഹാര സെല്ല് പരിശോധിക്കുകയും അദ്ധ്യാപകന് കുറ്റക്കാരനാണെന്ന് കണ്ടെത്തുകയും ചെയ്തു. ഇതിനെ തുടര്ന്ന് ഇയാളെ സസ്പെന്ഡും ചെയ്തിരുന്നു. ഇതിനെ പിന്നാലെയാണ് നിരവധി പെണ്കുട്ടികള് പരാതിയുമായി രംഗത്തെത്തിയത്. ഈ സാഹചര്യം കൂടി പരിഗണിച്ചാണ് സിന്ഡിക്കേറ്റ് ഈ അദ്ധ്യാപകനെ പുറത്താക്കാന് തീരുമാനിച്ചത്. 2021 ജനുവരിയിലാണ് ഇയാള് സര്വീസില് പ്രവേശിക്കുന്നത്.
