ഗസ്സ: യുഎസ് പ്രസിഡന്റ് ഡോണൾഡ് ട്രംപിന്റെ 15 ഇന സമാധാന റോഡ്മാപ്പ് നടപ്പാക്കാൻ തങ്ങൾ ഇപ്പോഴും പൂർണ സന്നദ്ധരായി തുടരുകയാണെന്ന് മുതിർന്ന ഹമാസ് നേതാവ് ബാസിം നഈം. പദ്ധതി നടപ്പിലാക്കാൻ പ്രസിഡന്റ് ട്രംപിന്റെ നേതൃത്വത്തിലുള്ള ‘ബോർഡ് ഓഫ് പീസും’ മധ്യസ്ഥരും അടിയന്തരമായി ഇടപെടണമെന്ന് നഈം ആവശ്യപ്പെട്ടു. ഗസ്സയിലെ ജനങ്ങളുടെ ജീവിതം പുനരുജ്ജീവിപ്പിക്കാനും മേഖലയിൽ കുറഞ്ഞ അളവിലെങ്കിലും ശാന്തതയും സമാധാനവും കൈവരിക്കാനുമുള്ള പരിശ്രമങ്ങളുമായി മുന്നോട്ടുപോകാൻ തയ്യാറാണെന്ന് ബാസിം നഈം സിഎൻഎന്നിന് നൽകിയ പ്രത്യേക അഭിമുഖത്തിൽ വ്യക്തമാക്കി.
വരാനിരിക്കുന്ന ഇസ്രായേൽ തെരഞ്ഞെടുപ്പിന്റെ പശ്ചാത്തലത്തിൽ പ്രധാനമന്ത്രി ബെഞ്ചമിൻ നെതന്യാഹുവിന്റെ രാഷ്ട്രീയ സാഹചര്യങ്ങളോട് ഹമാസ് ‘സഹാനുഭൂതി’ കാണിക്കണമെന്ന് യുഎസ് ഉപദേശകൻ ജാരെദ് കുഷ്നറും ബോർഡ് ഓഫ് പീസ് പ്രതിനിധികളും ആവശ്യപ്പെട്ടതായി നഈം വെളിപ്പെടുത്തി. എന്നാൽ ഒരു ഫലസ്തീനി എന്ന നിലയിൽ നെതന്യാഹുവിന്റെ തെരഞ്ഞെടുപ്പ് രാഷ്ട്രീയത്തിന് തങ്ങൾ വില നൽകേണ്ടതില്ലെന്നും നെതന്യാഹുവിന്റെ തെരഞ്ഞെടുപ്പ് വിജയത്തിനായി ഫലസ്തീൻ ജനതയുടെ രക്തവും ജീവനും വില നൽകാൻ തങ്ങൾ ഒരുക്കമല്ലെന്നും ബാസിം നഈം വ്യക്തമാക്കി.
