തിരുവനന്തപുരം: നീണ്ട 51 വര്ഷങ്ങള്ക്കുശേഷം തിരുനെല്ലി കാട്ടില് പോലിസ് വെടിയേറ്റു മരിച്ച നക്സല് വര്ഗീസിന്റെ കുടുംബത്തിന് നഷ്ടപരിഹാരം. സംസ്ഥാന മന്ത്രിസഭാ യോഗമാണ് ഇതുസംബന്ധിച്ച് തീരുമാനിച്ചത്. അന്പത് ലക്ഷം രൂപയാണ് നഷ്ടപരിഹാരമായി നല്കുന്നത്.
വര്ഗീസിന്റെ സഹോദരങ്ങളായ മറിയക്കുട്ടി, അന്നമ്മ, എ.തോമസ്, എ.ജോസഫ് എന്നിവര്ക്ക് നഷ്ടപരിഹാരം നല്കാന് സെക്രട്ടറി തല സമിതിയാണ് സര്ക്കാരിന് ശുപാര്ശ ചെയ്തത്.
1970 ഫെബ്രുവരി 18-നാണ് വര്ഗീസ് കൊല്ലപ്പെട്ടത്. വ്യാജ ഏറ്റുമുട്ടലിലാണ് നക്സല് വര്ഗീസ് കൊല്ലപ്പെട്ടതെന്ന് പിന്നീട് കോണ്സ്റ്റബിള് രാമചന്ദ്രനാണ് വെളിപ്പെടുത്തിയത്. വ്യാജ ഏറ്റുമുട്ടല് കേസില് ഐ.ജി ലക്ഷ്മണയെ സി.ബി.ഐ കോടതി ശിക്ഷിച്ചിരുന്നു. 1998-ലാണ് അന്ന് ഡി.വൈ.എസ്.പി ആയിരുന്ന ലക്ഷ്മണയുടെ നിര്ദേശ പ്രകാരമാണ് താന് വര്ഗീസിനെ വെടിവെച്ചു കൊന്നതെന്ന് കോണ്സ്റ്റബിള് പി.രാമചന്ദ്രന് നായര് വെളിപ്പെടുത്തിയത്. വര്ഗീസിനെ പോലിസ് കൊലപ്പെടുത്തിയതാണെന്ന് തെളിഞ്ഞതിനെ തുടര്ന്ന് ബന്ധുക്കള് നഷ്ടപരിഹാരത്തിന് ഹൈക്കോടതിയെ സമീപിച്ചിരുന്നു.