കൊച്ചി : കൊച്ചി സിറ്റി പോലീസ് കമ്മീഷണര് ഓഫീസില് പരാതി നല്കാന് എത്തിയ തന്നെ എ.എസ്.ഐ ശല്യം ചെയ്തതായി മുഖ്യമന്ത്രിക്ക് വീട്ടമ്മയുടെ പരാതി. കുടുംബപ്രശ്നങ്ങള് സംബന്ധിച്ച് ഡി.സി.പി.ക്ക് പരാതി നല്കാനാണ് എറണാകുളം സ്വദേശിനിയായ വീട്ടമ്മ കമ്മിഷണറുടെ ഓഫീസില് എത്തിയത്. പരാതി പരിഹാരത്തിനായി ഇവര്ക്ക് കൗണ്സിലിങ് നല്കാന് ഓഫീസിലെ ഒരു എ.എസ്.ഐ.യെ ചുമതലപ്പെടുത്തിയിരുന്നു.
കൗണ്സിലിങ്ങിനായി ഫോണ് വിളിച്ചു തുടങ്ങിയ എ.എസ്.ഐ പിന്നീട് അശ്ലീല സന്ദേശങ്ങള് വീട്ടമ്മയ്ക്ക് അയയ്ക്കുകയായിരുന്നു എന്നാണു പരാതി. പിന്നാലെ നഗ്നചിത്രങ്ങളും അശ്ലീല വീഡിയോകളും അയച്ചതായും ഇവരുടെ പരാതിയില് പറയുന്നു. പല തവണ താക്കീത് ചെയ്തിട്ടും എ.എസ്.ഐ സന്ദേശങ്ങള് അയക്കുന്നത് തുടര്ന്നു. താത്പര്യങ്ങള്ക്ക് വഴങ്ങില്ല എന്ന് ബോധ്യമായപ്പോള് അപവാദ പ്രചാരണങ്ങള് നടത്തിയെന്നും മുഖ്യമന്ത്രിക്ക് നല്കിയ പരാതിയില് വീട്ടമ്മ പറയുന്നു.
